20 jyldyqtaryn toılaǵan túlekterdiń vıdeosy jelide qyzý talqylanýda
JETІSAI. QazAqparat – Áleýmettik jelide karantındik shekteýlerge qaramastan mektep bitirgenderdiń 20 jyldyǵyn toılaǵan otyrystyń vıdeosy tarady, dep habarlaıdy QazAqparat tilshisi.
Jeli qoldanýshylary otyrystyń kórkin qyzdyrýshylardyń arasynda Túrkistan oblysyndaǵy quzyrly organ ókilderi men Shymkent qalasynyń Polıtsııa departamenti qyzmetkerleri bar ekenin jarysa jazǵan.
Túrkistan oblystyq PD baspasóz qyzmetiniń jetekshisi Saltanat Qarakózova QazAqparat tilshisine otyrystyń bıyl 24 mamyr kúni bolǵanyn rastady.
Onyń aıtýynsha, osy taratylǵan vıdeoǵa baılanysty Jetisaı aýdandyq PB arnaıy tekserý sharalaryn júrgizgen. Nátıjesinde otyrystyń Jetisaı qalasyndaǵy meıramhanalardyń birinde ótkeni anyqtalǵan.
«Áleýmettik jelide jarııalanǵan vıdeo boıynsha 25 mamyrda Jetisaı APB JPQ-niń qyzmetkerleri QR Ákimshilik kodeksiniń 425- babyna sáıkes jınaqtalǵan materıaldardy aýdandyq bas sanıtarlyq dárigerine shara qoldaný úshin joldady»,- deıdi Saltanat Qarakózova.
Al, Shymkent qalalyq Polıtsııa departamentiniń baspasóz qyzmeti de bul oqıǵaǵa qatysty túsinik berdi.
«Aǵymdaǵy jyldyń 24 mamyr kúni Jetisaı qalasyndaǵy «Jetigen» meıramhanasynda 20 jyldyq basqosý sharasy ótken. Oǵan 15 adam qatysqan. Onyń ishinde ishki ister organynda jumys isteıtin bir qyzmetker bar. Ol Eńbekshi aýdandyq polıtsııa basqarmasynda jumys isteıdi. Qazir qyzmettik tekserý jumystarynyń júrgizilýine baılanysty atalǵan qyzmetker jumystan ýaqytsha shettetildi. 2020 jyldyń 1 maýsym kúni tártiptik komıssııa otyrysynda osy qyzmetkerdiń tártiptik máselesi qaralyp, sheshim qabyldanady», - dedi departament.
Aıta keteıik, Túrkistan oblysy men Shymkent qalasynda karantındik shekteýler 8 maýsymǵa deıin uzartylǵan. Oǵan sáıkes barlyq qoǵamdyq tamaqtaný oryndary jabyq bolýy kerek.
