20 jylda Nur-Sultannyń klımaty qalaı ózgerdi
NUR-SULTAN. QazAqparat – «Qazgıdromet» RMK ǵylymı-zertteý ortalyǵynyń dırektory Nurlan Abaev keıingi jyldarda el astanasyndaǵy klımat qalaı ózgergenin aıtyp berdi, dep habarlaıdy QazAqparat tilshisi.
«Qalanyń aýmaǵy artyp, tirshiligi qyzǵan saıyn klımaty ózgerip keledi. Sonymen birge mańaıyndaǵy klımatqa da áser etedi», - dedi Nurlan Abaev QazAqparat tilshisine telefon arqyly bergen suhbatynda.
Onyń aıtýynsha, Nur-Sultandaǵy eń sýyq aı – qańtar: ortasha temperatýra -14,2 °S. Túnde temperatýra -20 °S-tan tómen bolsa, kúndiz -10 °S deńgeıinde bolady.
Elordadaǵy eń ystyq aı – shilde: ortasha temperatýra 20,8 °C. Túnde temperatýra orta eseppen 15,0 °C, al kúndiz 26 °C bolady.
1936 jyldyń 22 shildesinde qalada aýa temperatýrasy +41,6 °C bolǵan eken. Bul - ázirge qaladaǵy rekordtyq temperatýra.
«Jıyrma birinshi ǵasyrda eń joǵary temperatýra (+40,1 °S) 2005 jyldyń 7 shildesinde baıqaldy. Eń tómengi temperatýra (-40,6 S°) 2012 jyly 15 jeltoqsanda tirkeldi», - deıdi maman.
1-kestede 1980-2000 jáne 2001-2020 jyldardaǵy ortasha aılyq aýa temperatýrasy keltirilgen.
Kestege sensek, keıingi 20 jylda aýanyń ortasha jyldyq temperatýrasy 0,5 °S-qa kóterilgen.
1-keste. 1980-2000 jáne 2001-2020 jyldardaǵy aýanyń aılyq ortasha temperatýrasy
| Kezeń | I | II | III | IV | V | VI | VII | VIII | IX | X | XI | XII | Jyl |
| 1980-2000 | -14.1 | -14.5 | -8.7 | 5.0 | 13.4 | 19.5 | 21.1 | 18.6 | 12.1 | 4.2 | -6.7 | -12.1 | 3.2 |
| 2001-2020 | -14.4 | -13.9 | -6.6 | 5.9 | 14.1 | 19.6 | 20.8 | 19.0 | 12.5 | 4.6 | -5.5 | -12.0 | 3.7 |
«Sońǵy 20 jylda jeldiń jyldyq ortasha jyldamdyǵy 3,6-dan 2,8 m/s deıin tómendedi. Jeldiń basym baǵyty ońtústik-batystan ońtústik baǵytqa ózgerdi», - deıdi sarapshy.
Ol, sondaı-aq jyldyń barlyq aılarynda tynyq aýa raıy kóbeıip kele jatqanyn atap ótti.
2000 jylǵa deıin tymyq kúnder sany 35-51 aralyǵynda bolsa, qazir 55-81 aralyǵyna jetken. Ásirese tamyz aıy tynysh ótetin bolǵan.
2 keste. Borandy kúnder sany
| Borandy kúnder sany | |||||||||||||
| Kezeń | I | II | III | IV | V | VI | VII | VIII | IX | X | XI | XII | Jyl |
| 1980-2000 | 6 | 6 | 4 | 2 | 2 | 4 | 4 | 4 | 27 | ||||
| 2001-2020 | 3 | 3 | 2 | 1 | 1 | 1 | 3 | 14 | |||||
| Shańdy jel soǵatyn kúrder | |||||||||||||
| 1980-2000 | 1 | 2 | 2 | 2 | 2 | 2 | 11 | ||||||
| 2001-2020 | 2 | 2 | 2 | 1 | 1 | 1 | 9 |
2-keste boıynsha, jyldyń barlyq maýsymdarynda aýa-raıy qolaısyz kúnder azaıyp keledi.
Mysaly, boran men shańdy daýyl 2001-2020 jyldar aralyǵynda eki ese azaıǵan (27 kúnnen 14 kúnge deıin). Shańdy jel soǵatyn kúnder sany 11-den 9-ǵa qysqarǵan.
«Derekterge súıensek, keıingi 20 jylda qalanyń qysqy klımaty «qatal» rejımnen «ortasha qatal» rejımge aýysyp keledi», - dedi Nurlan Abaev.
