«20 jyl quldyqta bolǵan» reseılik nege ótirik aıtqanyn túsindirdi
NUR-SULTAN. QazAqparat – «20 jyl quldyqta boldym» dep jelini shýlatqan reseılik nege jalǵan vıdeo túsirgenin polıtsııa qyzmetkerlerine túsindirdi, dep habarlaıdy QazAqparat tilshisi.
«20 jyl boıy Qazaqstandaǵy sharýa qojalyqta erkimnen jumysqa jegildim» dep jelini shýlatqan reseılik polıtsııa qyzmetkerleri men Reseı Federatsııasy konsýldyǵynyń ókilderine shynyn aıtty. Bul týraly Polisia.kz saıty jazdy.
«Áleýmettik jelige monıtorıng jasaý kezinde ózin Reseı Federatsııasynyń azamaty Alekseı Aleksandrovıch Kotovpyn dep tanystyrǵan er adamnyń beıne úndeýi tabyldy. Vıdeoda ol Qaraǵandy oblysynyń aýmaǵynda erkinen tys ómir súrip jatqanyn aıtqan. Jelige taraǵan aqparat boıynsha qylmystyq is tirkelip, oqıǵanyń mán-jaıyn tekserý úshin Shet aýdanyndaǵy sharýa qojalyǵyna jedel-tergeý toby bardy. Qojalyq ıesi men Alekseı Kotovtan Reseı Federatsııasy konsýldyǵy qyzmetkerleriniń kózinshe jaýap alyndy», - dep jazady Polisia.kz.
Saıttaǵy málimetke sensek, Kotov sharýa qojalyq aýmaǵynda óz erkimen jumys istegen jáne qolynda uıaly telefony bolǵan.
«Ol qalaǵan ýaqytynda fermadan ketýge múmkindigi bolǵanyn moıyndady. Reseılik azamat sharýa qojalyǵynyń ıesiniń ústinen jazǵan aryzynan bas tartyp, oǵan eshqandaı shaǵymy joq ekenin túsindirdi. Vıdeo jazǵandaǵy jalǵyz maqsaty úıge oralý bolǵan», - delingen saıttyń málimetinde.
