20 jyl ishinde atamekenine 300 myńǵa jaqyn otbasy kóship keldi - Elbasy
ANA. 25 mamyr. QazAqparat /Marlan Jıembaı/ - 20 jyl ishinde atamekenine 300 myńǵa jaqyn otbasy kóship keldi. Búgin Astanada ótken Dúnıejúzi qazaqtarynyń IV Quryltaıynda QR Prezıdenti - Dúnıejúzi qazaqtary qaýymdastyǵy Tóralqasynyń tóraǵasy Nursultan Nazarbaev osylaı málimdedi.
«Qurmetti qandastar, Táýelsizdikpen birge atamekenge at basyn burǵan uly kóshke de 20 jyl boldy. Búgingi quryltaı osyndaı mereıli belespen tuspa-tus kelip otyr. Sondyqtan bıylǵydaı bataly jyly bizdiń bastamalarymyz jemisti bolýǵa tıis», - dedi Elbasy.
«Elge el qosylsa qut», degen halyq danalyǵymen sózin odan ári jalǵaǵan Memleket basshysy azamattyqtyń eleń-alańynda, kúrdeli kezeńge qaramastan kóshimiz kólikti bolǵandyǵyn, sodan beri uly kósh bir sátke tolastamaǵandyǵyn basa aıtty.
«At qazyǵyn baılar atamekenge 20 jyl ishinde 300 myńǵa jaqyn otbasy kóship keldi. Osylaısha el halqynyń sany 1 mıllıonnan artyq qandastarymyzben tolyqty. Dúnıejúzindegi óz qandastaryn eline shaqyryp, qarjy bólgen úsh-aq memlekettiń birimiz. Olar: Izraıl, Germanııa jáne Qazaqstan», - dedi N.Nazarbaev.
