20 jyl boıy bıe saýyp, qazaqtyń salt-dástúrin saqtap kelemiz - Omby turǵyny Záýresh Asanova
ASTANA. QazAqparat - Omby qalasy ákimshiliginiń qoldaýymen jyl saıyn ombylyq qazaqtar Dostyq qalasy merekesi aıasynda bıe baılap, tegin ulttyq taǵamdar taratady.
Qazaq ulttyq-mádenı avtonomııasy prezıdentiniń kómekshisi Záýresh Asanovanyń aıtýynsha, búgingi tańda Omby oblysynda 100 myńnan astam qazaq turady, dep habarlaıdy pavlodarnews.kz .
Óńirlik qazaq ulttyq mádenı avtonomııasynda segiz qoǵamdyq qazaq birlestigi bar.
«Qymyzmuryndyq merekesine bıyl osymen úshinshi jyl qatysyp otyrmyz. Ózimizben birge qymyz ala keldik. Biz de óz jerimizde uıymdastyrylatyn merekege oraı altybaqan quryp, kıiz úı tigemiz. Balalarǵa ana tilimiz ben salt-dástúrimizdi úıretemiz. Ata-enem ómir boıy ulttyq salt-dástúrdi berik ustanyp kelgen. Kelin bolyp túskenime 20 jyl bolsa da bıe saýýdy toqtatqan emespin. Tipti, keıde lıtrin 600 teńgeden saýdaǵa qoıamyz», - deıdi Záýresh Asanova.
Reseıde jumys isteı bastaǵan alǵashqy etno-mádenı birlestikterdiń biri Omby oblysynyń qazaq ulttyq-mádenı avtonomııasy 1999 jyly qurylǵan. Uıymnyń janynan «Omby qazaqtary» atty basylym shyǵady.
Eske sala keteıik, qalalyq demalys jáne mádenıet saıabaǵynda ótip jatqan halyqaralyq Qymyzmuryndyq merekesine Aqmola, Qaraǵandy, Almaty óńirleri men Reseı, Qyrǵyzstan elderiniń delegatsııasy qatysýda.
