20 JOO-da kóptildi mamandardy daıarlaıtyn arnaıy bólimder ashylady
ASTANA. 9 shilde. QazAqparat - Qazaqstanda 20 JOO basymdyqty mamandyqtar - ınjenerlik-tehnıkalyq jáne jaratylystaný-ǵylymı baǵyttarda kóptildi mamandardy daıarlaýǵa kirisedi.
Bul týraly QR BǴM-nyń baspasóz qyzmetinen málim etti.
Eske salaıyq, Elbasynyń tapsyrmasyna sáıkes kelesi jyldan bastap respýblıka mektepterinde birinshi synyptar úshin aǵylshyn tilinde oqytý júıesi engiziledi. Bul oqýshylar bes jyldan keıin pánderdi aǵylshyn tilinde oqı bastaıdy. Sol ýaqytqa deıin bul jumystardy oryndaýǵa bilikti mamandardy daıyndaý qajet. Sondyqtan da 2012-2013 oqý jylynda JOO-da kóptildi muǵalimderdi daıyndaýǵa naqty jáne tıimdi jumystar atqarý kerek.
QR bilim jáne ǵylym mınıstriniń ınjenerlik-tehnıkalyq, jaratylystaný ǵylymdary mamandyqtary boıynsha kóptildi mamandar daıarlaý úshin JOO-larda arnaıy bólimderdi ashý tapsyrmasy berildi.
Búgin bilim berýdegi kóptildilikti damytýǵa arnalǵan keńeste JOO-lardyń atalmysh bólimderdi ashý usynystary talqylandy.
«Sońynda 2012 jyldyń qyrkúıeginen bastap kóptildi mamandardy daıarlaıtyn joǵarǵy oqý oryndary anyqtaldy. Arnaıy bólimder 20 joǵarǵy oqý oryndarynda ashylady, onyń ishine ulttyq jáne jetekshi aımaqtyq joǵary oqý oryndary kirdi», - delingen taratylǵan baspasóz habarlamasynda.
