20 jylǵa jýyq eńbek ótili bar mal dárigeri «Shapaǵat» medalimen marapattaldy
PETROPAVL. KAZINFORM — Halyqaralyq áıelder kúnine oraı Prezıdent qolynan marapat alǵandardyń biri — Gúlmárııa Ýaıysova.
Gúlmárııa Qajyǵalıqyzy Soltústik Qazaqstan oblysy Shal aqyn aýdany Jańajol aýyldyq okrýginde veterınarlyq dáriger bolyp eńbek etedi. 54 jastaǵy áıel toqsanynshy jyldardyń basynda aýylsharýashylyǵy tehnıkýmyn bitirgen. Mal dárigeri bolyp eńbek etip júrgenine jıyrma jylǵa jýyqtaǵan.
— Prezıdenttiń qolynan «Shapaǵat» medalin aldyńyz, qutty bolsyn! Mereke qarsańynda bul kezdesý kútpegen oqıǵa bolǵan shyǵar?
— Iıa, árıne, qońyraý shalǵanda men jumysta júrgenmin. «Sizdi marapattaıtyn boldyq» dep aıtty. Basynda túsinbedim, oıladym, Petropavlǵa barý kerek shyǵar, oblystyq ákimdik quttyqtaıyn dep jatyr eken ǵoı dep. Eki kúnnen keıin aýdannan habarlasyp, Sizdi Astanada quttyqtaıdy, Prezıdent Qasym-Jomart Kemeluly ózi marapatty tabystaıdy, daıyndala berińiz degende ne dep jaýap bererimdi bilmeı qaldym. Kútpegen jaǵdaı boldy. Bul meniń ómirimdegi esten ketpes oqıǵa boldy.
— Mal dárigeri bolý úshin, menińshe, jan-janýarlardy jaqsy kórip, meıirimdi bolý kerek. Bul salaǵa qalaı kelip júrsiz?
— Aýyldyń qyzymyn, balalyq shaǵym tórt túliktiń arasynda ótti. Óıtkeni ákem kóp jyl boıy zootehnık, al anam saýynshy bolyp eńbek etti. Kishkentaıymnan ata-anamnyń qasynda júrip, olardyń jumysyn kórip óstim, kóp nárseni ákemnen úırendim. Al mektep bitirgen kezde mende basqa mamandyq tańdaımyn degen oıymda bolǵan joq.
— Mal dárigeriniń jumysy ońaı emes ekeni belgili, aýyrǵan maldy emdeýden basqa da mindetterińiz bar ǵoı?
— Negizgi mindetim, árıne, mal emdeý, mal aýrýlarynyń taraýyna jol bermeý. Qaı ǵalymnyń aıtqany ekeni esimde joq, «jaı dáriger adamdy emdeıdi, al veterınar dáriger adamzatty emdeıdi» degen. Men jalǵyz emespin, kómekshim bar. Ekeýimiz Jańajol, Jańatalap jáne Keńes aýyldaryna qyzmet kórsetemiz. Aýyl sharýashylyǵy maldaryn ıdentıfıkatsııadan ótkizemiz. Sondaı-aq janýarlardyń asa qaýipti aýrýlaryna qarsy mindetti veterınarııalyq-profılaktıkalyq jumys júrgiziledi. Ádette mal tóldeıtin kóktemde jumysymyz qyzady. Sibir jarasyna, qarasanǵa, nodýlıarly dermatıtke jáne basqa da aýrýlarǵa qarsy vaktsına egiledi. Ony ekpes buryn maldy brýtsellez, týberkýlezge tekserý úshin qan alamyz. Qustar da ımmýndaýdan ótedi. Veterınarııalyq is-sharalardy ýaqtyly jáne sapaly oryndaýdyń mańyzy zor, mal sharýashylyǵy ónimi men azyq-túlik qaýipsizdiginiń kepili. Jas mamandar keledi, olarǵa bilgenimdi aıtyp, tájirıbemmen bólisemin. Qoǵamdyq jumystardan da qalmaýǵa tyrysamyn.
— Otbasyńyz týraly aıtyp berińizshi. Balalaryńyzdyń arasynda jolyńyzdy qýǵandary bar ma?
— Joldasym, ókinishke oraı, 11 jyl buryn júrek aýrýynan — ınsýltten kenetten qaıtys boldy. Úsh balamen jalǵyz qaldym. Balalarym búginde er jetti. Qazir tuńǵysh ulym muǵalim bolyp jumys isteıdi. Qyzym turmysqa shyqqan, dekrettik demalysta otyr. Kenje qyzym ýnıversıtette oqyp, joǵary bilim alyp, ol da muǵalim bolady. Baqytty ana ǵana emes, ájemin de.
— Buǵan deıin marapattaryńyz bar ma?
— Alǵys hattarmen, Qurmet gramotasymen marapattaldym. ІІІ dárejeli «Eńbek dańqy» ordenim bar. Eńbegimdi elep-eskerip jatady. Jumysym qıyn, ári jaýapkershiligi mol, biraq soǵan qaramastan mal dárigeri mamandyǵyn tańdaǵanyma ókinbeımin. Óıtkeni, aýylyma, elime paıdam tıip jatyr. Búgingi múmkindikti paıdalanyp qyz-kelinshekterdi, áıelderdi merekemen quttyqtaǵym keledi. Qandaı jaǵdaıda bolmasyn meıirimdi, súıkimdi jáne qaıyrymdy qalyptaryńyzdan tanbańyzdar.
Búgin Prezıdent jarlyǵymen memlekettik jáne qoǵamdyq qyzmetke cińirgen eńbegi, eldiń áleýmettik-ekonomıkalyq jáne mádenı damýyna qosqan eleýli úlesi, sondaı-aq áskerı jáne qyzmettik boryshyn úlgili atqarǵany úshin birqatar sala mamany memlekettik nagradalarmen marapattalady.