20 jylǵa sozyldy: Petropavldaǵy kárizdik tazartý qurylysyn jańǵyrtý jobasy aıaqtalar emes
PETROPAVL. KAZINFORM – Petropavldaǵy kárizdik aǵyn sýlardy tazartý júıesin jańǵyrtý jobasy 20 jyldan beri aıaqtalmaı keledi. Bul ınfraqurylym óńir ekologııasy úshin mańyzdy nysandardyń biri.QR Ekologııa jáne tabıǵı resýrstar mınıstrligi Kazinform tilshisiniń osy máselege qatysty suraýyna jaýap berdi.
– Petropavlda kárizdik aǵyn sýlardy tazartý máselesin sheshý maqsatynda 2005 jyldan bastap jumys júrgizilip jatyr. Jergilikti atqarýshy organnyń málimeti boıynsha, qoldanystaǵy KOS-qa zertteý júrgizilip, tehnıkalyq tapsyrma ázirlenip, «QazOrtalyq TKSh» mekemesine kelisýge joldanǵan. Bul kelisimnen keıin ǵana jobalyq-smetalyq qujattama ázirleý úshin bıýdjettik ótinim berilmek. Petropavl qalasy ákimdigi jobalyq-smetalyq qujatty ázirleýge qarjy bólý úshin baǵa usynystaryn jınaý jumystaryn júrgizip jatyr, - delingen resmı jaýapta.
Mınıstrliktiń málimetinshe, 2024 jyly Soltústik Qazaqstan oblysynyń ekologııalyq máselelerin keshendi sheshý jónindegi Jol kartasy aıasynda uzyndyǵy 2,17 km bolatyn kollektorlarǵa kúrdeli jóndeý júrgizilgen. Qazirgi ýaqytta Petropavldaǵy KOS-tyń tehnologııalyq shemalaryn jańǵyrtýdy aıaqtaý boıynsha jumys atqarylyp jatyr. Budan bólek SQO-nyń 2023–2025 jyldarǵa arnalǵan qorshaǵan ortany qorǵaý jónindegi is-sharalar jospary aıasynda 2023 jyly KOS-ty, І-ІІІ kárizdik sorǵy stantsııalaryn jáne magıstraldyq qubyrlardy úsh kezeń boıynsha qaıta jańartý jobasy ázirlendi.
– Sonymen qatar Saýmalkól aýylynda KOS-ty qaıta qurý jáne Shal aqyn aýdanynyń Sergeevka qalasynda káriz jelileri men tazartý qurylystaryn salý kózdelgen. 2018 jyly Sergeevka qalasynda káriz jelileri men tazartý qurylystaryn salý jobasy ázirlendi. Qazirgi ýaqytta jobalyq uıym – «TS-Indýstrııa» memlekettik saraptama almaq. Alaıda Sergeevkada 8,1 myń adam ǵana bar, bul aýdandyq mańyzy bar qala mártebesi úshin jetkiliksiz. Sondyqtan bolashaqta bul eldi meken aýyl sanatyna aýysady. Jergilikti atqarýshy organ byltyr mınıstrlikke Sergeevka qalasyn KOS jobalaryn iske asyrýdyń ekinshi kezeńinen alyp tastaý týraly hat joldady, - deıdi mınıstrlik ókilderi.
Al qurylysy Ǵabıt Músirepov atyndaǵy aýdannyń ortalyǵy Novoıshımskoe aýylynda 2018 jyly bastalǵan KOS qurylysy byltyr aıaqtaldy. Bul maqsatqa 3,2 mlrd teńge jumsaldy.
Buǵan deıin Ekologııa jáne tabıǵı resýrstar mınıstri Erlan Nysanbaev Qoshqar ata kólin qalpyna keltirý nege toqtap turǵanyn aıtqan edi.