20 jyldyq eski kólikterdiń saýdasy avtonaryqta toqtaıdy — sarapshy

ALMATY. KAZINFORM — Almatyda júrilgen kólik naryǵyna baılanysty konferentsııa ótti.

Kazinform tilshisine Qazaqstan avtokólik odaǵynyń prezıdenti Anar Maqasheva elimizdiń kólik naryǵynda sońǵy jyldary qandaı ózgeris bolǵanyn aıtyp berdi. Onyń sózinshe, qazir qazaqstandyqtar arasynda eski kólikterge qaraǵanda jańa temir tulparǵa suranys joǵary.

— Búgingi kúni elimizdiń azamattary jańa kólik tizgindep, eski kóligin jańasyna aýystyrǵysy keledi. Bul jaqsy. Minilgen kólikterdiń satylýy 2 jyl burynǵy ýaqytqa qaraǵanda áldeqaıda azaıǵan. Biraq oǵan tek Qytaı kólikteriniń naryqqa kirýi áser etti deı almaımyz. Jalpy elimizde jańa kólikter kóbeıip, olardyń baǵasy tómendedi. Kólikterdiń barlyq túri boıynsha, meıli ol sedan jáne jol talǵamaıtyn kólik bolsyn, usynys kóbeıdi. Tıisinshe, ekinshi naryqtaǵy baǵalardyń tómendeýine áser etti, — dedi ol.

Sonymen qatar Anar Maqasheva 20 jyldan astam ýaqyt qoldanysta bolǵan kólikter aldaǵy ýaqytta naryqtan múldem shyǵyp qalýy múmkin ekenin atap ótti.

— Bul tendentsııaǵa qarasaq, aldaǵy ýaqytta qatty eskirgen kólikter múldem satylmaı qalýy múmkin. Qazir elimizdiń avtokólik parkinde 6,4 mln mashına bar, onyń 86,6 paıyzy jeńil kólikter. Sondaı-aq jalpy kólikterdiń jartysyna jýyǵy 20 jyldan asqan. Eýropa, Azııa, AQSh-ta mundaı kólikter qoldanylmaıdy, olar naryqtan shyǵyp qalady. Qazir bizdiń qazaqstandyqtar da osyndaı kólikterdi aýystyrýǵa nıetti. Elimizdegi trend soǵan qaraı bet burdy. Boljam boıynsha 20 jyldyq kólikter aldaǵy ýaqytta naryqta ótpeı qalady, biraq 10 jyldyq kólikterdiń saýdasy áli de toqtamaıdy, — dedi ol.

Eske salaıyq, buǵan deıin kólik naryǵyndaǵy jaǵdaı týraly jazǵanbyz.