20 jylda 1,4 myń aýyl joıylyp ketti – senator
ASTANA. KAZINFORM – Senator Serik Shaıdarov depýtattyq saýalynda aýyldarda ómir súrý sapasynyń tómendep bara jatqanyn jáne aýyldardyń joıylyp ketýine ákelip soǵatyn problemalardy atady.
Depýtat «Aýyl – el besigi» baǵdarlamasyna da toqtaldy. 2019 jyldan beri jumys istep kele jatqan ol aýyldyq jerlerde ómir súrý sapasyn jaqsartýdy kózdeıdi. 2014-2023 jyldar aralyǵynda respýblıkalyq bıýdjetten 524 mıllıard teńge bólinip, 1800 aýylda 5 myńnan astam jobany júzege asyrýǵa múmkindik týdy.
Onyń paıymynsha, baǵdarlamada turaqty jumys oryndaryn ashý kórsetkishi joq, bul aýyldy damytýdyń álemdik tájirıbesine qaıshy keledi. Munda tabys deńgeıi men jumyssyzdyq sııaqty ekonomıkalyq kórsetkishter basty ról atqarady.
Senator elimizde keıingi 20 jylda 1404 aýyldyń joıylyp ketkenin, bul jaǵdaı aýyldyq aımaqtarǵa qatysty memlekettik saıasatty qaıta qaraý qajet ekenin baıqatyp otyrǵanyn alǵa tartty.
«Memlekettik qoldaýdyń qatysýymen bólinetin barlyq nesıelerdi «Aýyl – el besigi» boıynsha aýyldyq eldi mekenderdi qarjylandyrýmen baılanystyrý jáne negizgi ındıkatordy osy eldi mekenderdegi salalar boıynsha jalpy qosylǵan qunnyń jyl saıynǵy ósýine monıtorıng júrgize otyryp, jańa turaqty jumys oryndarynyń ashylýymen aıqyndaý usynyldy. Qalyptasqan jaǵdaıdy eskere otyryp, «Nege ınfraqurylymǵa mıllıardtaǵan soma quıylatyn aýyldyq eldi mekenderde bólingen nesıeler men bıznes ashý boıynsha taldaý joq?» degen suraq týyndaıdy. «Aýyl – el besigi» jobasynyń maqsaty – osy aýyldardaǵy ekonomıkalyq ósý ólshemi arqyly aýyl turǵyndarynyń ómir súrý sapasyn jaqsartý. Іs júzinde bıýdjet qarjysyn ádettegideı ıgerý júrip jatyr, al turaqty jumys oryndary ashylmasa, memleket salynǵan qarjydan tıisti nátıje ala almaıdy», - dedi Serik Shaıdarov Úkimet basshysy Oljas Bektenovtiń atyna joldaǵan saýalynda.
Senatordyń usynysynda aýyldy jerlerde ekonomıkalyq damýǵa jáne jańa turaqty jumys oryndaryn ashýǵa basa nazar aýdara otyryp, «Aýyl – el besigi» baǵdarlamasyna keshendi taldaý júrgizý kerek eneni aıtyldy.
