20 jyl tapjylmaı otyrǵan: Qyzylordada 6 sport mektebiniń dırektory rotatsııalandy

QYZYLORDA. KAZINFORM — Qyzylorda oblysynda sport mektebi dırektorlaryn rotatsııalaý osy oqý oryndaryndaǵy jalpy kórsetkishke oń áser etti. Bul týraly oblystyq dene shynyqtyrý, sport jáne týrızm basqarmasynan habarlady. 

Dene shynyqtyrý jáne sport týraly zańǵa bıyl ózgerister men tolyqtyrýlar engizilgen. Soǵan sáıkes uzaq jyl sport mekemelerin basqaryp kelgenderge rotatsııa tártibi engizilip, basqarý júıesi jańartyldy.

— Osynyń nátıjesinde sport mekemelerindegi jalpy kórsetkishter jaqsara tústi. Jyldy mektepterdiń kórsetkishi men jetken jetistigin olımpıadalyq sport túrlerine súıenip qorytyndylaımyz. Eń tómen kórsetkish kórsetken sport mektebi dırektorlarynyń jumysyn zań aıasynda qarastyramyz. Jańa zań aıasynda 4 jyldan astam qyzmette otyrǵan mektep dırektorlaryn jumystaǵy jetistigine baılanysty rotatsııalaımyz, — dedi basqarma basshysy mektep.

Buǵan deıin 6 dırektor rotatsııa tártibimen aýystyryldy. Rotatsııa basshylyq qyzmette tórt jyldan uzaq otyrǵan adamdarǵa baılanysty. Baqtııar Artaev óńirde basshylyq qyzmette jıyrma jyldan kóp ýaqyt tapjylmaı otyrǵandar bolǵanyn jasyrmady.

— Tórt jyldan aspaýy kerek dep esepteımin. Odan uzap ketse, nátıjege kóńil bólmeýi múmkin. Mundaı ózgeris salanyń boıyna qan júgirtý úshin kerek. Al eger basshy júıeli jumys júrgizip jatqan bolsa, ornynda qaldyramyz. Másele jumysy suıylyp, nátıje kórsetpegenderge baılanysty. Onyń ornyna tómen qyzmettegi qolynan is keletin azamattardy qoıamyz, — dedi ol.

Eske salsaq, «Memlekettik bilim berý uıymdarynyń birinshi basshylary men pedagogtary laýazymdaryna taǵaıyndaý, laýazymdarynan bosatý qaǵıdalaryn bekitý týraly» Bilim mınıstri men Eńbek jáne halyqty áleýmettik qorǵaý mınıstriniń birlesken buıryǵynyń jańa redaktsııasy 15 sáýirde kúshine endi.