20 jeltoqsanǵa deıingi aralyqta 3,9 mln. tonnaǵa jýyq jańa astyq jóneltildi - Aýyl sharýashylyǵy mınıstrligi
ASTANA. 21 jeltoqsan. QazAqparat - Aǵymdaǵy jylǵy bastapqy salmaqtaǵy 29,7 mln. tonna bitik astyq, oǵan qosa 15,0 mln. tonnadan astam joǵary eksporttyq múmkinshilik - respýblıka ishinde jáne eksportqa jóneltý qarqynyn ulǵaıtý sharalaryn qabyldaý qajettiligin týyndatyp otyr,
dep habarlady QR Aýyl sharýashylyǵy mınıstrliginiń baspasóz qyzmetinen.
Vedomstvonyń atap ótýinshe, 2011 jyldyń 1 qyrkúıegi men 20 jeltoqsany aralyǵynda 3,9 mln. tonnaǵa jýyq jańa astyq jóneltilgen, onyń 2,2 mln tonnasy eksportqa shyǵarylsa, 1,7 mln. tonnasy respýblıka ishinde tasymaldandy. Soltústik oblystardyń astyq qabyldaý kásiporyndarynan basqa oblystardyń qambalaryna «Azyq-túlik kelisimshart korporatsııasy» UQ» AQ-ymen 500 myń tonna astyqty jóneltý aıaqtaldy.
Jalpy qarasha aıynda 1,3 mln. tonnaǵa jýyq astyq jóneltildi, onyń ishinde 853 myń tonna eksportqa shyǵarylyp, respýblıka ishinde 419 myń tonna astyq tasymaldandy. Bul 2011 jyldyń 14 qazandaǵy QR Aýyl sharýashylyǵy mınıstrliginiń jáne QR Kólik jáne kommýnıkatsııa mınıstrliginiń selektorlyq otyrysyndaǵy tapsyrmaǵa saı atqaryldy.
Buǵan qosa, vagondardyń jetispeýshiliginen jeltoqsan aıynda astyqty jóneltý qarqynynyń tómendeýi baıqaldy. 2011 jyldyń 13 jeltoqsanynda ótken QR KK jáne QR AShM selektorlyq otyrysynda ústimizdegi aıdyń sońyna deıin 1,1 mln. tonna astyq jóneltý júkteldi. Biraq, 20 jeltoqsandaǵy jaǵdaı boıynsha 480,9 myń tonna astyq eksportqa jóneltilgen. Bul otyrysta belgilengen tasymaldanatyn jalpy astyq kóleminiń 43,7 paıyzyn quraıdy.
Osyǵan baılanysty 2011 jyldyń 21 jeltoqsanynda ótkizilgen QR KK jáne QR AShM selektorlyq otyrysynda ústimizdegi jyldyń astyq ónimin tasymaldaý qarqynyn barynsha ulǵaıtý qajettiligi týraly sheshim qabyldandy.
Osyǵan baılanysty ilespe qujattardy ýaqytyly rásimdeý boıynsha uıym basshylarynyń jáne qyzmetterdiń jaýapkershilikterin joǵarlatý, vagondardyń bos turyp qalýyna jol bermeý maqsatynda astyq qabyldaý kásiporyndarynyń úzdiksiz jumysyn qamtamasyz etý boıynsha sharalar kúsheıtiledi.
