20 jeltoqsan kúni barsha qazaqstandyqtar «ujymdyq medıtatsııaǵa» qosylsa aqyrzaman elimizdi aınalyp ótýi múmkin
ASTANA. 10 jeltoqsan. QazAqparat - 2012 jyldyń 21 jeltoqsany datasy jaqyndaǵan saıyn osy kúni maııa kúntizbesi boıynsha bolýy tıis aqyrzaman týraly áńgimeler jıi aıtyla bastady.
Bir apta buryn aqyrzamannyń taıap qalǵandyǵy týraly qaýesetke qatysty Amerıka ǵarysh agenttigi resmı túrde pikiri bildirdi. Kezek bizdiń otandyq ǵalymdarǵa jetti.
Sátbaev atyndaǵy Qazaq ulttyq tehnıkalyq ýnıversıtetiniń dotsenti, geologııalyq-mıneralogııalyq ǵylymdardyń kandıdaty Mıhaıl Kazantsev Qazaqstan aýmaǵyn aqyrzamannan saqtap qalýdyń bir-aq jolyn kórip otyr ol - «ujymdyq medıtatsııa ádisi». Dotsent óz usynysynyń mán-jaıyn «Megapolıs» gazetine usynǵan hatynda jazyp kórsetti.
Kazantsev qazaqstandyqtardy 20 jeltoqsan kúni keshki saǵat 22.00-de 5 mınýt boıy «ujymdyq medıtatsııa seansyn» ótkizýge shaqyrady. «Osy mınýttarda ishteı: «Qazaqstanda bári tamasha, jaıly ári tynysh» degen frazany birneshe ret qaıtalaý qajet. Aqyrzamanǵa qatysty eshbir oı sizdi mazalamaýy tıis», - dep paıymdaıdy dotsent.
Ǵalymnyń pikirinshe, bılik onyń ıdeıasyn qoldaı otyryp «parasatty sheshim qabyldar edi», sebebi, joba jarnama men habarlandyrýǵa ketken shyǵynnan basqa eshqandaı qarjyny qajet etpeıdi. Kazantsev atap ótkendeı, medıtatsııanyń sáttiligi adamdardyń sanyna baılanysty.
Aıta keteıik, Mıhaıl Kazantsev buǵan deıin jasandy jarylystar arqyly Almatyny joıqyn jer silkinisterinen saqtap qalýdy usynǵan bolatyn. Onymen qosa, ońtústik astanada turaqty túrde bolyp turatyn quıyndy daýyldardy boljap, Qazaqstan boıynsha ortasha jyldyq temperatýranyń artýy múmkindigin málim etken bolatyn.
