20 jastaǵy jigit dombyranyń elektrondyq nusqasyn jasap shyǵardy
ShYMKENT. QazAqparat - Ońtústikqazaqstandyq ónertapqysh dombyranyń elektrondyq nusqasyn jasap, qoldanysqa engizdi. ІT mamany Nurlan Qambardyń arqasynda kez-kelgen azamat dombyrany uıaly telefonnan tartyp, án shyrqaýyna bolady. Úırengisi keletinder dombyranyń elektrondyq nusqasyn tegin júkteı alady, dep habarlaıdy QazAqparat HAA tilshisi.
Elbasynyń «Bolashaqqa baǵdar: rýhanı jańǵyrý» maqalasynda aıtylǵan ulttyq kodymyzdy jańǵyrtý maqsatynda jasalǵan bul jańalyq kópshiliktiń qyzyǵýshylyǵyn týǵyzyp otyr. «Apple» kompanııasy maquldaǵan bul baǵdarlamany jýyrda ǵana AQSh-taǵy «Apple» kompanııasy maquldatyp, Nurlan Qambar avtorlyq quqyq ıesi atandy.
Búginde Nurlan Baýyrjanuly Almatydaǵy Súleımen Demırel atyndaǵy ýnıversıtettiń aqparattyq júıeler mamandyǵynyń 2 - kýrsynda oqıdy. Jastaıynan oqýda ozat bolyp, zeıini zerek ósken Nurlannyń aldaǵy armany - ataqty ІT mamany ataný. 
Dombyranyń elektrondyq nusqasyn oılap tapqan 20 jasar jigitke bul ıdeıa Astanadaǵy EKSPO kórmesine barǵanda kelipti. Nurlannyń bul ıdeıasyn iske asyrýǵa «qazaqstandyq Stıv Djobs» atanyp ketken Arman Súleımenov aqyl-keńes bergen.
«Qazirgi tańda qazaq jastary jańashyldyqqa umtylyp, jańa tehnologııalardy ıgerýge kúsh salyp jatyr. Solardyń biri retinde men de óz baǵymdy synap kórýdi jón sanap, alǵashqy eńbegimdi júzege asyrýǵa tyrystym. Bul baǵdarlamanyń bir ereksheligi - dombyra úırenýge ári dombyra joq jerde uıaly telefonnan kúı nemese án tartýǵa múmkindik beredi. Atalǵan baǵdarlamany myna siltemeden tegin júktep alýyńyzǵa bolady», - deıdi ónertapqysh.
Búginde ónertapqysh jazǵy demalys kezeńin paıdalanyp, Astana qalasyndaǵy Nazarbaev ýnıversıtetindegi ІT mamandardan arnaıy sabaq alyp júr.
