20 jastaǵy kelinshek kúıeýi men sábıin tastap Sırııaǵa ketken

ALMATY. QazAqparat – Teolog, dintanýshy, Nur Múbárak Egıpet Islam mádenıeti ýnıversıtetiniń doktoranty, respýblıkalyq aqparattyq nasıhat tobynyń múshesi Serikjan Enshibaı 25 jasynda Sırııadaǵy musylmandarǵa baryp qosylǵan áıeldiń oqıǵasyn aıtyp berdi.

Aqtóbe oblysy Muǵaljar aýdanynyń turǵyny, 20 jastaǵy kelinshek kúıeýi men 1 jastaǵy balasyn tastap Sırııadaǵy sodyrlar tobyna qosylǵan.

«Men ol áıeldiń kúıeýimen jumys jasadym. Sebebi, kúıeýi de jat aǵym jeteginde bolǵan. Áıel alǵashynda múlde dinge qatysy joq bolatyn. Hıdjab kımegen, namaz oqymaǵan. Jyldar boıy kúıeýi sony aıtyp, kinálaı bergen. Sosyn áıeline aıta bergen soń, kelinshek ózi izdene bastaıdy. Sóıtip, ınternetten oqı bastaǵan. Bir kúni kúıeýi áıelin tappaı qalady. Birneshe kúnnen soń kelinshegi ózi habarlasqan», - dedi teolog.

Áıel áleýmettik jeli arqyly Sırııadaǵy DAISh terrorıstik uıymyna qosylǵan. Sóıtip, kúıeýine eregisip, DAISh-tiń qarmaǵyna túsken.

«Meni ımanyń joq dep ábden aıtýshy ediń goı, men mynda naǵyz mıssııamdy taptym. Dinge qyzmet etip jatyrmyn. Soǵysyp jatqan shyn musylmandarǵa qyzmet etýge (seksýaldy qyzmet bolýy da múmkin) keldim» degen. Sonda bul áıel adasqany sonsha, jezóksheliktiń ózin qudaı jolynda qyzmet etý, saýap dep túsingen. Men basynda biraz jumys jasadym. Odan keıin ol kisilermen basqa teologtar jumys istedi. Áıeldiń kelgen-kelmegenin bilmeımin. Taǵdyry beımálim», - dedi Serikjan Enshibek.

Teolog mamannyń aıtýynsha, jat aǵym jeteginde ketkendermen tek teolog jumys jasaǵany azdyq etedi. Óıtkeni olar psıhologııalyq aýyr jaraqat alyp keledi.

«Qataryna kóbine qorqytyp tartady. «Eger aǵymnan shyqsań tozaqqa túsesiń, myna jaqta qarap otyrsań musylman emessiń, musylmandar qınalyp jatyr, mynda jıǵan-dúnıe múlkińnen ne qaıyr, dúnıe-múlik pe, aqshalaı ma, álde qarý alyp soǵysý kerek» degen sııaqty argýmentter keltiredi. Qataryna kelgende shyǵa almaıtyndaı etip ýlaıdy», - dedi ol.

Sanasy ýlanǵan azamattar aldanǵanyn, dinniń saıası qural retinde paıdalanylǵanyn Sırııaǵa barǵanda bir-aq uǵady.

Kesh bolady, qutylý múmkin bolmaıdy. Qujattary joq, baıqap qalsa ólim jazasyna kesedi. Qasıetti soǵys alańynan qashýǵa áreket jasady degen aıyp taǵady.

Bul aǵymnyń ózi birneshe topqa bólinedi. Olardyń ishinde biren-sarany soǵys, jıhadty úgitteıdi. Kóbinese olar basqa aǵymdaǵylardy «úıde otyratyn qorqaq musylmansyńdar» dep kinálaıdy.

Destrýktıvti aǵymdardyń kópshiligi ıslamdaǵy neke qatynasyna dıskredıtatsııa jasaıdy.

«Eger radıkal salafıt aǵymyndaǵy er adam túrmege túsip qalsa, ony áıeli moıyndamaýy múmkin. Sebebi, Sırııadaǵy pirleri «seniń kúıeýiń musylman emes, aralaryńdaǵy neke buzyldy, odan da basqa naǵyz musylman taýyp al» dep úıretedi. Kúıeýi túrmege túsken soń álbette onymen jumys jasalady. Olar sanasy ózgeredi, musylmandyqtan shyǵady, kúıeýim endi adam bolmaıdy dep sanaıdy. Túrmede otyrǵan jigitterdiń kópshiligine áıeli kelip bosatýyn suraıdy. Sol kezde biz aralasyp, ajyrasýǵa bolmaıtynyn túsindiremiz. Sózimiz senimdi bolý úshin buryn nekelerin qıǵan kýágerlerdi ákelemiz. Bul protsestiń barlyǵy qıyndap ketedi», - dedi dintanýshy.