20 jastaǵy jigit Free Fire oıyny arqyly jasóspirimderdi aldap, alaıaqtyq jasaǵan
ASTANA. KAZINFORM – Túrkistan oblysynda polıtsııa Free Fire oıyny arqyly jasalǵan alaıaqtyqty áshkereledi, – dep habarlaıdy Polisia.kz.
Onlaın oıyn balalar úshin qyzyq álem ekeni sózsiz. Alaıda alaıaqtar sol vırtýaldy keńistikti óz paıdasyna jaratyp, senimge kirýdiń túrli aılasyn taýyp jatyr.
Osyndaı alaıaqtyqtyń qurbany bolǵan turǵyn Jetisaı aýdandyq polıtsııa bólimine aryzdanyp, bank esepshotynan qarajatynyń zańsyz sheshilgenin habarlaǵan. Belgili bolǵandaı, jábirlenýshiniń kámeletke tolmaǵan týysy telefonnan Free Fire oıynyn oınap otyrǵan sátte oǵan beıtanys azamat baılanysqa shyqqan.
Oıyn barysynda kúdikti túrli ýáde berip, «bonýstar» men «utystardy» alǵa tartyp, jasóspirimnen bank kartasynyń derekteri men telefonǵa kelgen SMS-kodty surap alǵan. Sonyń saldarynan jábirlenýshiniń esepshotynan 380 myń jymqyryldy.
Jedel-izdestirý is-sharalarynyń nátıjesinde 20 jastaǵy Shymkent qalasynyń turǵyny anyqtalyp, polıtsııa bólimine jetkizildi. Kúdiktiden alaıaqtyq áreketterge paıdalanylǵan 5 telefon tárkilendi.
Kıberpol qyzmetkerleri kúdiktiniń 60-tan asa jasóspirimmen oıyn arqyly baılanysqa shyǵyp, olardyń 20-dan astamynan aqsha alǵanyn anyqtady. Qazirgi ýaqytta atalǵan fakt boıynsha sotqa deıingi tergeý amaldary júrgizilip jatyr.
Kúdiktiniń ózge de qylmysqa qatysy bar-joǵy anyqtalady.
- Qurmetti ata-analar! Balalaryńyzdyń ınternettegi áreketine beıjaı qaramańyzdar. Bank kartasynyń derekteri men SMS-kodty eshkimge berýge bolmaıtynyn únemi eskertip otyryńyzdar, - delingen habarlamada.
Aıta keteıik, Bas prokýratýra 8 naýryz qarsańynda alaıaqtyq faktileri týraly eskertti.