20 jastaǵy Kımı Antonellı «Formýla-1» tarıhyndaǵy eń jas chempıon atandy
ASTANA. KAZINFORM — Mercedes komandasynyń ıtalııalyq pıloty Kımı Antonellı Meksıka Gran-prı jarysynyń qorytyndysyna oraı «Formýla-1» chempıondyǵyn merziminen buryn jeńip alyp, chempıonat tarıhyndaǵy eń jas pılot atandy. Bul týraly DW jazdy.
Jarys 1 qarashada Mehıko qalasynda ótti. Antonellı úshinshi oryn aldy, biraq onyń upaılary álem chempıonatynda merziminen buryn jeńiske jetýine jetkilikti boldy.
Meksıka Gran-prıiniń jeńimpazy Red Bull komandasynda óner kórsetken tórt dúrkin álem chempıony Maks Ferstappen boldy. Jeti dúrkin chempıon Lıýıs Hemılton (Ferrari) ekinshi orynmen shekteldi.
Meksıka Gran-prıinen keıin Antonellıdiń jalpy eseptegi kóshbasshylyǵy 119 upaıǵa jetti, bul ony ókshelep qýyp kele jatqan qarsylastary úshin qol jetpes meje bolyp qaldy.
Osylaısha, nemis avtoshabandozy Sebastıan Fetteldiń 16 jyl saqtalǵan rekordy jańardy. Fettel 2010 jyly eń jas álem chempıony atanǵan kezde 23 jas 134 kún tolǵan edi.
Antonellı sonymen qatar Formýla-1 tarıhynda chempıondyq tıtýldy jeńip alǵan úshinshi ıtalııalyq sportshy boldy.
Bul jetistikke buryn Djýzeppe Farına 1950 jyly jáne Alberto Askarı 1952 jáne 1953 jyldary qol jetkizgen. Osylaısha, Italııa 73 jylda alǵash ret álem chempıondyǵyn toılap otyr.
Kımı Antonellı Formýla-1 mansabyn 2024 jyly Mercedes komandasynyń synaq júrgizýshisi retinde bastaǵan. Ótken maýsymda ol úsh ret júldeli orynǵa kóterilip, chempıonatty 150 upaımen jetinshi orynmen aıaqtaǵan.
2026 jylǵy maýsymda ıtalıan pıloty toǵyz Gran-prı jarysynda jeńiske jetip, óziniń alǵashqy chempıondyq tıtýlyn merziminen buryn jeńip aldy.
Eske sala keteıik, Astanada «Formýla-1» trassasyn salý usynyldy.
