20 jastaǵy elektrık Býrabaıdy jaryqpen qamtamasyz etip júr
KÓKShETAÝ. KAZINFORM – Jumysshy mamandyqtar jyly aıasynda biz ómirimizdiń ajyramas bóligine aınalǵan mamandyq ıelerine toqtalýdy jón sanadyq. Solardyń biri 20 jastaǵy elektrık – Murat Tabataev.
Býrabaı kýrortynyń jaryǵyna jaýapty jas maman Aqmola oblysynda dúnıege kelgen. Ol Şýchınsk qalasyndaǵy tehnıkalyq kolledjdi bitirgennen keıin birden elektrık bolyp jumysqa ornalasqan.
Onyń negizgi qyzmetine kýrorttyq nysandardyń turaqty elektrmen jabdyqtalýy, jaryqtandyrylýy, jelilerdiń ýaqtyly jóndelýi men profılaktıkasy kiredi. Jas maman eptiliginiń, iskerliginiń arqasynda óz isin tııanaqty oryndap, basshylyqtyń senimine ıe bolǵan. Kýrortqa kelgen demalýshylar da jaılylyqty sezinip, mundaǵy qyzmetkerler alańsyz ózine júktelgen jumysyn istep júr.
– Býrabaıdaǵy jumysyma árdaıym yjdaǵattylyqpen, tııanaqtylyqpen kirisemin. Sol úshin de meniń eńbegimdi joǵary baǵalaıdy. Aldaǵy ýaqytta mamandyǵym boıynsha joǵary oqý ornyna túsýdi josparlap júrmin. Bir orynda toqtap qalmaı, ósýdi, damýdy jalǵastyra beremin, - deıdi M. Tabataev.
Murat – úshinshi razrıadty elektrık. Bolashaqta ol tehnıkalyq bilimin jetildirip, týǵan ólkesiniń damýyna eleýli úles qosqysy keledi.
Eske sala keteıik, buǵan deıin Óskemende Jumysshy mamandyqtary jyly aıasynda Workshop alańy uıymdastyrylǵanyn jazǵan edik.