«20 jasta qos aıaǵymnan aıyryldym» – Azııa rekordyn jańartqan parasportshy
ASTANA. KAZINFORM – 20 jasynda jol apatyna túsip, qos aıaǵynan aıyrylǵan Aısulý Súleımenova araǵa jyldar salyp, parasporttan óz ornyn tapty.
Búginde ol halyqaralyq jarystarda Qazaqstan namysyn qorǵap, Azııa paraoıyndarynda 100 metrge júgirýden qurlyq rekordyn jańartty. Oǵan qosa, Quryltaıdyń alǵashqy shaqyrylymyna depýtat atanyp úlgergen. Tilshilerge bergen suhbatynda A. Súleımenova sportqa qalaı kelgenin aıtyp berdi.
Búgin Aqordada Azııa oıyndary men Azııa paraoıyndarynyń jeńimpazdary jáne júldegerlerin marapattaý rásiminde Prezıdent Qasym-Jomart Toqaev Aısulý Súleımenovanyń qaısarlyǵyn erekshe atap ótti. Memleket basshysy onyń taǵdyrdyń qıyn synaǵyna qaramastan, alǵa umtylyp, kópke úlgi bolyp júrgenin aıtty.
Sportshynyń ózi de búgingi jetistiginiń artynda ońaı jol bolmaǵanyn jasyrmaıdy. 2011 jyly, nebári 20 jasynda, jol apatyna túsip, eki aıaǵynan aıyrylǵan. Bul onyń ómirindegi eń aýyr synaqtardyń biri boldy.
– Kóp qıyndyqty bastan ótkerdim ǵoı. Ásirese eń úlken synaq – jol apatyna túsip, eki aıaǵymnan aıyrylǵanym. Degenmen búgin osyndaı dárejege jetkenime, Prezıdenttiń ózi meni maqtan tutyp, erekshe atap ótkenine óte qýanyshtymyn, – deıdi Aısulý.
Birneshe jyldan keıin A. Súleımenova parasport týraly estip, jeńil atletıkamen aınalysýǵa bel býǵan. Sodan beri sportshynyń ómirinde jańa kezeń bastaldy.
– Sport meni ómirge qaıta ákelgendeı boldy. Ómirge degen qushtarlyǵymdy arttyryp, alǵa umtylýǵa motıvatsııa berdi, – deıdi ol.
Aısulý júgirý kezinde arnaıy sporttyq protez paıdalanady. Al kúndelikti turmysta basqa protez kıedi. Onyń aıtýynsha, sporttyq protez júgirýge beıimdelgen jáne jattyǵý men jarys kezinde ǵana qoldanylady.
Azııa paraoıyndaryndaǵy básekeniń de ońaı bolmaǵany aıtyldy. Aısulý qarsylastarynyń birazymen buǵan deıin halyqaralyq jarystarda kezdesken. Sondyqtan jeńis ońaılyqpen kelgen joq.
– Qarsylastarym óte myqty boldy. Olardyń barlyǵyn buryn basqa halyqaralyq jarystardan kórgenmin. Degenmen bul joly jeńis maǵan buıyrdy, – deıdi sportshy.
Aıta keteıik, búgin Aqordada Prezıdent Azııa oıyndary jáne Azııa paraoıyndarynyń jeńimpazdary men júldegerlerin marapattady.
Buǵan deıin jarystaǵy nátıjesi joıylǵan ıAsmına Toqsanbaeva Azıadadan keıingi ómiri týraly suhbat bergen edi.
