20 jasqa deıingi jastar arasyndaǵy Álem chempıonatynda qazaqstandyq hokkeıshiler sátti óner kórsetýde
ALMATY. 14 jeltoqsan. QazAqparat - Keshe Ýkraınanyń Donetsk qalasynda ótip jatqan 20 jasqa deıingi jastar arasyndaǵy Álem chempıonatynda qazaqstandyq hokkeıshiler kezekti jeńisine qol jetkizdi.
Vıktor Bogatyrov jattyqtyratyn Qazaqstan quramasy bul joly Italııa quramysynan 2:1 esebimen basym tústi. Buǵan deıin olar horvattardy 5:0 esebimen oısyrata jeńip, tek alǵashqy oıynda polıaktarǵa 3:6 esebimen ese jibergen edi. Endi kelesi oıyndaryn 16 jeltoqsanda Ýkraına men Ulybrıtanııa komandalarymen ótkizedi.
Byltyr Polshanyń Tyhy qalasynda 12-18 jeltoqsanda ótken Álem chempıonatynda olar japondardy 2:1, polıaktardy 2:0, horvattardy 4:3 esebimen utyp, frantsýzdarǵa 1:2, ıtalıandyqtarǵa 0:1 bop utylǵan bolatyn. Sonyń nátıjesinde 12 upaı jınaǵan frantsýzdar «A» tobyna beriletin joldamany qorjyndaryna salyp, Qazaqstan 10 upaımen ekinshi, Italıa 8 upaımen úshinshi, Polsha 7 upaımen tórtinshi, Horvatııa 6 upaımen besinshi, al Japonııa 2 upaımen altynshy oryndy qanaǵat tutqan bolatyn.
