20 tonna qara metaldy shekara asyrmaq bolǵan Reseı azamaty ustaldy

ASTANA. 9 jeltoqsan. QazAqparat - Demalys kúnderi qazaqstandyq shekarashylar birqatar kontrabandalyq júkter men esirtkilik zattardyń jolyn kesti, dep habarlaıdy QR UQK ShQ baspasóz qyzmetinen.

Aqtóbe shekara otrıadyna qarasty «Álimbet avto» ótkizý-baqylaý beketiniń narıady «Kamaz» avtokóligine qujatsyz 20 tonna qara metall synyqtaryn tıep, shekara aspaq bolǵan Reseı azamatyn toqtatty.

Qyzylordada shekarashylar qalalyq ishki ister basqarmasynyń esirtkige qarsy kúres bólimi qyzmetkerlerimen birlese otyryp, 1976 jyly týǵan Qyrǵyz Respýblıkasynyń azamatyn ustady. Tekserý barysynda ustalǵan azamattyń sómkesinen salmaǵy 10 keli bolatyn «geroın» tabyldy.

Sondaı-aq, «Saryaǵash t.j.» shekaralyq baqylaý beketiniń narıady «Qazaqstan-Ózbekstan» baǵytyndaǵy poıyzdy qaraý kezinde ıesi joq 20 lıtrge jýyq spırt pen 22 keli kondıterlik ónimderin aldy.

Atalǵan derekter boıynsha quqyqqorǵaý organdary habarlandyryldy. Tergeý amaldary júrgizilýde.