20 tamyzda SQO-da egin jınaý naýqany bastalady

PETROPAVL. QazAqparat – Soltústik Qazaqstan oblysynda 4,4 mln ga astam alqaptan dándi daqyldy ýaqytynda jınap alý úshin 7300 kombaın tartylmaq, dep habarlaıdy QazAqparat tilshisi.

SQO Aýyl sharýashylyǵy jáne jer qatynastary basqarmasynyń basshysy Meıram Meńdibaevtyń aıtýynsha, óńirde egin oraǵy 20 tamyz bastalady dep josparlanǵan. Qazirgi ýaqytta naýqanǵa daıyndyq qyzý júrgizilip jatyr. Tehnıka saılandy. Oraqqa 7300 kombaın, sonyń ishinde 3800 ónimdiligi joǵary jańa tehnıka tartylmaq. Bıyl oblys kásipkerleri 1400-den astam tehnıkany 33,1 mlrd teńgege satyp aldy.

«Oblysta 4,4 mln ga dándi daqyl egildi. Bul shamamen ótken jylǵy kórsetkishpen birdeı. Sonyń ishinde 3,1 mln ga – bıdaı, 1 mln – maıly dándi daqyl, qalǵany dándi-burshaqty daqyldar. Bıyl kúnbaǵystyń alqabyn shamamen eki ese ulǵaıtyp, 119 myń ga jetkizdik. Sondaı-aq jasymyq 66 myń ga jerge egildi, bul byltyrǵymen salystyrǵanda eki ese kóp.

Óńirge 78,5 myń tonna arzandatylǵan baǵamen dızel otyny bólindi, operatorlar anyqtaldy. Baǵasy osy kúzgi naýqanǵa lıtrine 219 teńge bolyp bekitildi», - deıdi Meıram Meńdibaev.

Bıyl jalpy aýa raıy dıqandar úshin qolaıly boldy. Jaýyn da bar, kún de ystyq. Mamannyń aıtýynsha, soǵan qaraǵanda astyqtyń shyǵymy da, sapasy da jaman emes.

«Endigi mindet – jaz boıy mańdaı termen ósirilgen dándi shashaý shyǵarmaı jınap alý. Elevatorlar men qambalar bıylǵy jyldyń jańa astyǵyn qabyldaýǵa daıyn tur. Jalpy syıymdylyǵy - 6,6 mln tonna. Oraq naýqanyn merziminde ótkizýge jaǵdaı bar, tek aýa raıy kedergi keltirmese bolǵany», - deıdi basqarma basshysy.

Qazirgi ýaqytta sharýashylyqtar qystyń qamyn jasap, shópke kirisken. Bıyl óńirde shóptiń de shyǵymy jaqsy.