20 shildede «Astana» - «Jalgırıs» kezdesýi kezinde kólik qozǵalysy jartylaı shekteledi
ASTANA. QazAqparat - 20 shildede ÝEFA chempıondar lıgasynyń ekinshi biliktilik raýndy aıasynda «Astana» fýtbol klýby lıtvalyq «Jalgırıs» komandasymen kezdesedi.
Match kezinde keıbir kóshelerde kólik qozǵalysy jartylaı shekteledi.
Keshki saǵat 18.00-den match aıaqtalǵansha Qabanbaı batyr jáne Turan dańǵyldary Kereı men Jánibek handar kóshesinen Hýseın ben Talal kóshesine deıin jabylady. Áýejaı aýdanyna baratyn astanalyqtar men jaqyn mańdaǵy kentterdiń turǵyndarynan aınalyp ótý joldaryn aldyn ala josparlaýdy suraımyz. Sondaı-aq, Orynbor arqyly júrýge keńes beremiz.
Ádettegideı, jankúıerler úshin arnaıy transfer uıymdastyrylady. Avtobýstar «Qazaqstan» SK, Astanalyq tsırk, Q. Muńaıtpasov atyndaǵy stadıon, «Áziret Sultan» jáne «Nur Astana» meshitteriniń janyndaǵy (shyǵys jaǵynan) turaqtardan júredi. Jol júrý bıletiniń quny - 90 teńge.
- Matchty kórýge adamdar kóp keledi dep oılaımyz, 25-30 myńǵa jýyq. Osyǵan baılanysty qoǵamdyq tártip pen jol qaýipsizdigin qamtamasyz etý boıynsha keshendi sharalar qabyldaıtyn bolamyz. Eki myńnan astam polıtsııa jáne ishki ásker qyzmetkerleri tartylady, - dedi Jergilikti polıtsııa qyzmetiniń basshysy Baqytjan Malybaev.
Sonymen qatar, saǵat 20.30-da «Astana Arena» stadıony arqyly júretin № 10, 12, 27, 40, 43, 53, 51 marshrýttar jıileıdi. Jalpy alǵanda, 100-ge jýyq avtobýs júredi, dep habarlaıdy astana.kz.
