20 shilde. QazAqparat kúntizbesi
20 shilde, JUMA
Halyqaralyq shahmat kúni
Halyqaralyq shahmat federatsııasynyń qurylýyna oraı 1966 jyldan bastap atap ótiledi. Búgingi tańda atalǵan uıymǵa álemniń 200-ge jýyq eli múshe. Federatsııanyń óz týy, ánurany jáne «Biz barlyǵymyz bir otbasymyz» atty urany bar.
Oıynnyń ataýy parsy sózderinen shyqqan: shah mat - «bıleýshi qaıtys boldy» degendi bildiredi. Shahmattyń otany - Úndistan. Onda V ǵasyrda chatýranga oıyny paıda bolǵan. Shahmat - 64 tordan turatyn taqtanyń ústine 32 (16 aq jáne 16 qara fıgýra) fıgýrany ornalastyrý arqyly oınalatyn oıyn. Oıynnyń maqsaty - qarsylasyńnyń koroline mat qoıý. Ár qalada sporttyń osy túrin unatatyndarǵa arnalǵan shahmat klýby bar. Halyqaralyq shahmat kúninde bul klýbtarda saıystar, oıyn-saýyq sharalary ótedi.
Kolýmbııa Respýblıkasynyń memlekettik meıramy - Táýelsizdik kúni (1810)
Kolýmbııa - Ońtústik Amerıkada ornalasqan memleket. Shyǵysynda Venesýela, Brazılııamen, ońtústiginde Ekvador, Perýmen, soltústik-shyǵysynda Panamamen shektesedi. Ákimshilik jaǵynan 32 departament pen astanalyq okrýgke bólinedi. Resmı tili - ıspan tili. Aqsha birligi - peso. Konstıtýtsııa boıynsha eldi Prezıdent basqarady jáne ol 4 jylǵa bir-aq ret saılana alady. Zań shyǵarýshy organy - Senat jáne Ókilder palatasynan turatyn parlament.
Qazaqstan Respýblıkasy men Kolýmbııa arasyndaǵy dıplomatııalyq qarym-qatynas 1992 jylǵy qyrkúıektiń 23-inde ornatyldy.
Qyrǵyzstan Ulttyq gvardııasynyń kúni
1992 jyldyń 20 shildesinde Qyrǵyzstan Respýblıkasy Ulttyq gvardııasynyń alǵashqy gvardııashylary Otanǵa jáne halyqqa adal qyzmet etýge ant qabyldady. Ulttyq gvardııa Qyrǵyzstan Prezıdentiniń qaýlysymen 1991 jyldyń 3 jeltoqsanynda quryldy.
ESTE QALAR OQIǴALAR
1969 jyly Dinmuhamed Qonaev Qapshaǵaı GES-iniń irgetasynyń sımvoldyq plıtasyn qoıdy.
1993 jyly QR Prezıdenti Nursultan Nazarbaev Taılandqa alǵash ret resmı saparmen bardy.
1994 jyly Qazaqstan Respýblıkasy Prezıdentiniń «Uly Otan soǵysyna qatysýshylar men ardagerlerdi áleýmettik qoldaý jónindegi qosymsha sharalar týraly», «Zeınetkerler men turmysy tómen otbasylardy áleýmettik qorǵaý jónindegi aımaqtyq qaıyrymdylyq qorlaryn uıymdastyrý týraly» Jarlyqtary jarııalandy.
1995 jyly Qazaqstan Respýblıkasynyń Prezıdenti N.Nazarbaev «Qazaqstan Respýblıkasyndaǵy keden isi týraly» zań kúshi bar Jarlyqqa qol qoıdy.
1995 jyly Qazaqstan Respýblıkasynyń Prezıdenti N.Nazarbaev «Baǵaly metaldar men asyl tastarǵa baılanysty qatynastardy memlekettik retteý týraly» zań kúshi bar Jarlyqqa qol qoıdy.
2005 jyly Astananyń Kongress-Hollynda Eýroparlament depýtaty Strýan Stıvensonnyń Semeı ıadrolyq synaq polıgonynyń qaıǵy-qasiretin beıneleıtin «Máńgilik qasiret» atty fotokórmesi bolyp ótti.
Birneshe jyl buryn S.Stıvenson Semeı óńirine baryp, 1000-nan astam fotosýret túsirgen bolatyn, onda adamzatqa qastandyq bolyp sanalatyn synaqtyń búkil qorqynyshy kórsetilgen. S.Stıvenson Semeı polıgonynyń máselesine kóńil bólgeni úshin «Semeı qalasynyń qurmeti azamaty» ataǵyna ıe bolǵan. Sonymen qatar, ol keńes ıadrolyq synaq qarýynyń qurbandary týraly jazǵan maqalalarynyń qalamaqylaryna Semeı qalasyndaǵy onkologııa ortalyǵyna medıtsınalyq jabdyq satyp alyp berip, Semeı óńiriniń turǵyndaryna zattaı kómek kórsetken.
2006 jyly Almatydaǵy «Qazaqstan» kınoteatrynda «Tańsári» balalar teatrynyń «Qazaqstan balalarynyń soǵys ardagerlerine iltıpaty» atty derekti fılmi tanystyryldy.
2009 jyly Qostanaıda «Qazaqtyń dástúrli sot júıesi» kitabynyń jáne «Torǵaı men Tobyldyń bıleri» fılminiń tanystyrylymy ótti.
Bul shyǵarmalar «Mádenı mura» memlekettik baǵdarlamasy aıasynda jasaldy.
2010 jyly Almaty qalasynyń Alataý aýdanynda aýdandyq sot pen prokýratýranyń jańa ǵımaratynyń saltanatty ashylý rásimi ótti.
2011 jyly Astanada QR Tuńǵysh Prezıdenti mýzeıinde «Koroldik oıyn» kórmesi ashyldy. Onda jurtshylyqqa Prezıdent Nursultan Nazarbaevqa Ýkraına, Belarýs, Armenııa kóshbasshylary, belgili grossmeısterler Anatolıı Karpov pen Vıshvanatan Anand syılaǵan shahmat toptamasy alǵash ret kórsetildi.
2011 jyly Pavlodardaǵy №8 lıtseıdiń bitirýshisi, «Altyn belgi» tósbelgisiniń ıegeri Jaslan Baraısov fızıkadan Bangkokta ótken bedeldi halyqaralyq olımpıadada (IPhO-2011) altyn medaldy jeńip aldy. J. Baraısovtyń esimi «Qazaqstan úmiti» jáne «Daryndy balalar - Qazaqstannyń bolashaǵy» entsıklopedııasyna kirgizildi.
2014 jyly Beıjińde alǵash ret dombyra kýrsy ashyldy. Sabaqty aptasyna úsh ret, 2 saǵattan qandasymyz Mural Bımuratuly júrgizdi. Úsh topta 50 shaqty adam boldy, birinshi topta - tek qazaqtar, ekinshisinde - qytaılyqtar, úshinshi top - aralas.
2016 jyly Qazaqstanda data.egov.kz ashyq derekter portaly jumys isteı bastady.
2017 jyly burynǵy Ońtústik Qazaqstan oblysynyń Báıdibek aýdanynda, Arys ózenine jaqyn mańnan kóne zamannyń teńgesi, astyq saqtaıtyn qumyra, jazýlar jazylǵan taqtaısha jáne toptastyra jerlengen adamdardyń súıegi tabyldy. Ol zattar bul jerde bizdiń zamanymyzdyń birinshi ǵasyrynda Qańly memleketine qaraǵan gúldengen qala bolǵanyn aıǵaqtaıdy. Qalanyń jasyn anyqtaýǵa monetanyń septigi tıdi.
1534 jyly Kembrıdjde álemdegi alǵash baspa tirkeldi.
1944 jyly Gıtlerdiń Ranstenbýrgtegi (Shyǵys Prýssııa) stavkasynda Adolf Gıtlerge qarsy eń iri qastandyq jasaldy. Áskerılermen kezdesý barysynda, Bas shtabtyń 37 jastaǵy podpolkovnıgi Klaýs Shenk fon Shtaýffenberg keńes ótip jatqan ústeldiń astyna ishinde saǵat mehanızmine qosylǵan bombasy bar portfeldi qoıdy. Kóp uzamaı «men qońyraý shalýym kerek», degen sózdermen ol ǵımarattan shyǵyp ketedi.
Keńes barysynda ofıtserlerdiń biri bombasy bar portfeldi birneshe metrge jyljytyp qoıyp, sonyń arqasynda Gıtler aman qalǵan.
Gıtlerdiń nusqaýymen sol kúni Shtaýffenberg pen onyń basqa da sybaılastary Berlınde ustalyp, atyldy. Keıin taǵy 200-ge jýyq adam jazalandy, olardyń deni azaptap óltirilgen.
1969 jyly adamzat tarıhynda alǵash ret amerıkalyq ǵarysh kemesi «Apollon-11» aıǵa qondy.
1976 jyly Marstyń joǵarǵy qabatynda alǵashqy zertteýler bastaldy.
1993 jyly Lıtvada derbes valıýta - lıt engizildi.