Irannyń Meshhed áýejaıynan halyqaralyq reıster qaıta jandanady
ASTANA. KAZINFORM — Irannyń Azamattyq avıatsııa uıymy jeksenbi kúni soltústik-shyǵystaǵy Horasan-Rezavı provıntsııasynyń Meshhed qalasy áýejaıynan halyqaralyq reısterdi 20 sáýirden bastap qaıta jandandyrýǵa ruqsat bergenin habarlady, dep jazady Sınhýa.
Vedomstvonyń resmı saıtynda jarııalanǵan málimdemede bul sheshim Irannyń shyǵys bóligindegi áýe keńistiginde halyqaralyq ushýlardy qaıta bastaý týraly buǵan deıingi habarlamadan keıin qabyldanǵany aıtylǵan. Sondaı-aq keıbir áýejaılar 18 sáýir kúni jergilikti ýaqyt boıynsha saǵat 07:00-de jumysyn qaıta bastaǵan.
Alaıda ishki reısterge bıletter satýǵa ázirge ruqsat berilmegeni atap ótildi.
Eske salaıyq, Iran 28 aqpanda AQSh pen Izraıldiń birlesken áskerı soqqylarynan keıin áýe keńistigin jaýyp, barlyq azamattyq áýe qatynasyn toqtatqan bolatyn.
Azamattyq avıatsııa uıymynyń málimetinshe, áskerı jáne azamattyq organdar qajetti tehnıkalyq ári operatsııalyq daıyndyqty aıaqtaǵan soń, eldegi áýe qatynasy birtindep qalypty rejımge kóshedi.
Budan buryn Italııa, Ispanııa jáne Avstrııa AQSh-qa áskerı qoldaý kórsetýden bas tartyp, Iranǵa qarsy operatsııada ózderiniń áýe keńistigi men ınfraqurylymyn paıdalanýǵa shekteý qoıǵanyn jazdyq.
