20 sáýirden bastap elordada qandaı kásipkerlik sýbektileri jumysyn jandandyrady
NUR-SULTAN. QazAqparat - Elordanyń ınvestıtsııalar jáne kásipkerlikti damytý basqarmasynyń basshysy Erlan Bekmýrzaev qalada qyzmeti ruqsat etilgen kásipkerlik sýbektileriniń jumysyna túsinik berdi, dep habarlaıdy QazAqparat tilshisi.
«Memleket basshysynyń tapsyrmasyna baılanysty kásipkerlik sýbektileriniń jumysyn kezeń-kezeńmen qaıta qalpyna keltirý sharalary bastaldy. Qalanyń jedel shtabynyń sheshimimen 20 sáýirden bastap jumysyn jalǵastyratyn kásiporyndardyń tizimi bekitildi», - dedi E. Bekmýrzaev qala ákimdiginiń baspasóz ortalyǵyndaǵy onlaın baspasóz máslıhatynda.
Olardyń qatarynda: ónerkásiptik, óndiristik kásiporyndar; qurylys salasy (qurylys materıaldaryn óndirý jáne tasymaldaý, onyń ishinde joldardy salý men jóndeýmen aınalysatyn kompanııalar); sanıtarlyq-epıdemıologııalyq talaptardy kúsheıte otyryp, iri qurylys dúkenderi; kólik, qoımada saqtaý, aýyl sharýashylyǵy salasyna qyzmet kórsetý kompanııalary; avtokólik salondary, avtobólshekter satatyn dúkender jáne qyzmet kórsetý stantsııalary (výlkanızatsııa, kólik jýý); hımııalyq tazalaý, kir jýý qyzmeti; orgtehnıkany jóndeý bar.
«Osy atalǵan salalar úshin jumys kestesi saǵat 9:00-den 18:00-ge deıin bekitildi», - dep naqtylady basqarma basshysy.
Meıramhanalar men dámhanalar onlaın-tapsyrys boıynsha jumysyn saǵat 22: 00-ge deıin jalǵastyrady.
Sonymen qatar, ekinshi dárejeli bankter saǵat 9:00-den 16:00-ge deıin jumys isteıtin bolady. Qyzmetkerlerdiń jalpy sany 50% aspaýy kerek. Al notarıýstar aldyn ala jazylý arqyly jumysyn jalǵastyrady.
