20 sáýir kúni Qazaqstanda tele-radıoarnalar jumysy ýaqytsha toqtatylady

NUR-SULTAN. QazAqparat – Teleradıo habarlaryn taratý jelilerinde josparly-profılaktıkalyq jumystar júrgiziledi, dep habarlaıdy QazAqparat «Qazteleradıoǵa» silteme jasap.

20 sáýir kúni saǵat 03:00 - 17:00 aralyǵynda (Nur-Sultan qalasynyń ýaqytymen) jerseriktik, tsıfrlyq jáne analogty efırlik jelilerdiń tehnıkalyq quraldaryndaǵy servıster jabylyp, josparly-profılaktıkalyq jumystar júrgiziledi. Osyǵan baılanysty, Qazaqstannyń barlyq aýmaǵynda teleradıoarnalardy retranslıatsııalaý ýaqytsha toqtatylady.

«Qazteleradıo» AQ toqsan saıyn jerseriktik jáne efırlik jelilerdiń tehnıkalyq quraldarynda servısterdi jaba otyryp, josparly-profılaktıkalyq jumystar júrgizedi. Bul jumystar teleradıo habarlaryn sapaly taratýdy qamtamasyz etý úshin qajet. Al, toqsan saıynǵy josparly-profılaktıkalyq jumystar servısti uzaq ýaqyt óshirýge múmkindik beredi, sondyqtan osy ýaqyt ishinde tehnıkalyq quraldardy jańǵyrtý boıynsha qosymsha jumystar da júzege asyrylady.

Aıta keteıik, jyl basynda «Qazteleradıo» AQ Basqarma tóraǵasy aýysqan bolatyn.