20 ret mal urlaǵan qylmystyq top ustaldy - Bas prokýratýra
"Búginde biraz qylmystyq toptar áshkerelenip, tergeý júrgizilip jatyr. Mysaly, Qaraǵandy men Pavlodar oblystarynda bir uıymdasqan qylmystyq top ustaldy. Olar mal uralýdyń 20 faktisine qatysqan eken. Qazirgi kezde Qylmystyq kodekstiń 188-bap boıynsha olardy uıymdasqan qylmystyq topty qurǵany úshin jáne iri kólemde zalal keltirgeni úshin qamaýǵa alyp otyr. Tergeý sharalary júrgizilip jatyr", - dedi M.Axmetjanov elordada ótken baspasóz máslıxatynda.
Onyń aıtýynsha, búginde respýblıka boıynsha mal urlyǵy 16 protsentke azaıyp otyr. Degenmen, atalǵan máseleni júıeli túrde qarastyrý qajet. "Mal urlyǵy - bul óte kúrdeli másele. Zań boıynsha urlanǵan maldyń basy kóp bolyp, ony qylmystyq top aıdap áketse, ondaı qylmys aýyr dárejege jatady. Bul jerde keshirimge jol berilmeıdi. Biz mal urlyǵyn júıeli túrde qaraýymyz qajet. Óıtkeni ony kásip dep eseptesek, maldy urlaǵasyn, sony satyp alatyn adamdar bar. Olar da qylmysqa qatysyp otyr. Sol maldy bazarǵa aparatyn avtokólik bar. Maldy satý úshin jalǵan qujattar jasalady. Veterınarlyq anyqtama jáne taǵysyn taǵy. Qazirgi kezde osy salada biraz sharalar qolǵa alynyp jatyr. Sonyń bári oń nátıje beredi dep senemiz", - dep atap kórsetti M.Axmetjanov.
Aıta keteıik, búgingi brıfıngte Bas prokýrordyń orynbasary áleýmettik jelide taraǵan vıdeoǵa qatysty pikir bildirdi. Belgisiz bireý iri kólemde aqsha jymqyrǵan Bergeı Rysqalıev Ulybarıtanııada júrgenin túsirip alypty.
