20 naýryzdan bastap Joshy han týraly fılm kınoteatrlarda kórsetiledi

ALMATY. KAZINFORM - 20 naýryzdan bastap elimizdiń barlyq kınoteatrlarynda «Joshy han. Uly ulystyń ámirshisi» atty jańa derekti-kórkem fılm jaryqqa shyǵady.

Fılm belgili jýrnalıst ári prodıýser Maııa Bekbaevanyń bastamasymen Qazaqstan Respýblıkasy Prezıdenti Teleradıokesheniniń qoldaýymen túsirildi. Kórermen derekti-kórkem fılm arqyly Altyn Ordanyń negizin qalaýshy, Shyńǵys hannyń úlken uly Joshy han dáýirine úńiledi.

Fılmniń bas prodıýseri jáne stsenarıı avtory Maııa Bekbaeva túsirilim ótken jyldyń tamyz aıynda ótkenin jáne shamamen bir aıǵa sozylǵanyn atap ótti. Al kınotýyndynyń stsenarııin jazýǵa jarty jyldan astam ýaqyt jumsalǵan. Aıtýynsha, taqyrypqa ený úshin tereń zertteý men tarıhshylardyń keńesi qajet bolǵan.

- Jarty jyl stsenarıı jazyldy, bir aı daıyndyq jumystaryna ketti jáne túsirilim shamamen bir aıǵa sozyldy. Odan keıin fılm postóndiris satysynda boldy, qazir tolyqtaı daıyn. Biz premera úshin 20 naýryzdy arnaıy tańdadyq, óıtkeni bul balalar úshin kóktemgi demalys bastalatyn ýaqyt. Baǵasy qoljetimdi bolady. Bul – komedııa emes, aǵartýshylyq, tanymdyq týyndy. Bul –bizdiń tarıhymyz jáne ony bilý óte mańyzdy, - dedi Maııa Bekbaeva.

Prodıýserdiń aıtýynsha, fılm túsirý ıdeıasy ótken jyly Ulttyq Quryltaıda Prezıdent Qasym-Jomart Toqaev Altyn Ordanyń 800 jyldyǵyna atap ótiletinin jarııalaǵannan keıin týyndaǵan.

- Bul dál kórkem fılm deýge kelmeıdi, jańa format — derekti-kórkem joba, kórkem sahnalardy qamtıtyn jýrnalıstik avtorlyq týyndy. Kórermenge bul format qanshalyqty unaıtynyn bilý óte qyzyq. Eger adamdar kınoǵa qýana kelse, onda biz jobalardy osy baǵytta túsirýdi jalǵastyramyz. Biraq men bul jobaǵa qatty senemin, - dedi ol.

Fılmdi túsirý úshin kıno komanda belgili túrkitanýshy Tımýr Kozyrevpen keńesip, sol kisiniń kómegimen dıalogtardy túrki jáne mońǵol tilderinde jazǵan. Fılmde bul dıalogtar saqtala otyryp, orys tiline dýblıajdalǵan, sondaı-aq tilinde sýbtıtrler qoıylǵan.

- Biz fılm úshin orys tilin tańdadyq, óıtkeni ol ártúrli platformalar men ınternette taralady. Bizdiń fılmdi orys tildi aýdıtorııa, sonyń ishinde TMD elderinde kórgenine múddelimiz. Sondaı-aq bul qazaq tilin bilmeıtin, Qazaqstanda turatyn orys tildi aýdıtorııamyzǵa qajet. Olar bizdiń tarıhymyzdy bilýi úshin bizdiń ıdeologııanyń tabaldyryǵynan tys qalmaýy mańyzdy, - dedi ol.

Kastıng Almaty men Astana qalalarynda ótken jáne onlaın-kezeńnen bastalǵan. Akterler dıalogtardy jazyp, beınejazbalar jibergen, keıin komandamen jeke kezdesipti.

- Bizdiń rejısser Arhat Ordabaıdyń keńesi boıynsha bas keıipker – Joshy hannyń rólin jas akter Shynǵys Beıbituly somdady. Shyńǵys hanǵa keletin bolsaq, sheshimdi birden qabyldadyq. Onyń róli talantty akter Bolat Uzaqovqa buıyrdy. Baqytymyzǵa oraı, onyń túsirilimge ýaqyty men múmkindigi boldy, biz ony jobaǵa qýana shaqyrdyq, - dedi Maııa Bekbaeva.

Eske salaıyq, buǵan deıin Joshy han týraly halyqaralyq tarıhı serıaldyń túsirilimi bastalǵanyn jazǵanbyz.