20 myńnan astam kásipker «Damý» qory arqyly óz bıznesin qarjylandyrdy
ASTANA. QazAqparat - Ótken jyly qor esebinen jalpy somasy 473,3 mlrd teńgeniń 21 072 jobasy qarjylandyryldy, dep habarlaıdy QazAqparat tilshisi.
«2018 jyly qor baǵdarlamalary arqyly qarjylandyrylǵan jobalardyń jalpy somasy 473,3 mlrd teńgeni quraıdy. Barlyǵy - 21 072 joba. Ekinshi deńgeıli bankter arqyly jeńildikpen nesıelendirý baǵdarlamasy boıynsha ótken jyly 17 690 jobaǵa 248,5 mlrd teńge nesıe berildi. Odan bólek, nesıesin sýbsıdııalaǵan jobalar sany 1 432 bolsa, oǵan jumsalǵan soma 173,2 mlrd teńgeni quraıdy. Bank aldynda kepilzaty jetpegen jaǵdaıda kepildik alǵan jobalar sany 48%-ǵa artyp, nesıeler boıynsha 1950 kepildik berildi», - dedi «Damý» qory basqarma tóraǵasynyń orynbasary Gaýhar Bóribaeva OKQ-de ótken baspasóz máslıhatynda.
Onyń aıtýynsha, búginde qor shaǵyn jáne orta bıznesti qoldaýǵa erekshe kóńil bólip, atalǵan salada birqatar jumystar atqarǵan.
«Shaǵyn jáne orta kásipkerlikti qoldaý quraldaryn ońaılatý maqsatynda biz baǵdarlama talaptaryna ózgerister engizdik. Ol ózgerister boıynsha nesıege erkin mólsherleme bekitilip, jobalardy qaraý ýaqyty qysqardy. Shaǵyn jobalardy óńirlik úılestirý keńesiniń qatysýynsyz qaraý múmkin boldy. Sonymen qatar, nesıe ótinimderin qaraýdyń biryńǵaı standarty engizilip, nesıeleý sharalary men qujat jınaý protsesteri ońtaılandyryldy. Sol sııaqty ShOB qoldaýdyń shetelde jemisti júzege asqan jańa quraldary engizildi. Ol quraldar ishki naryqtaǵy bıznes pen Qazaqstannyń shet eldegi ınvestıtsııasy, taýarlary men qyzmetteri ekspansııasyna qosymsha múmkindik beredi», - dedi ol.
Odan bólek, G.Bóribaeva málim etkendeı, elimizde shaǵyn jáne orta kásipti ekinshi deńgeıli bankter arqyly nesıelendirýde Astana, Almaty qalalary men Qaraǵandy oblysy kósh bastap tur.
