20 myńdyq banknotany shyǵarý qanshaǵa tústi?
ASTANA. QazAqparat - Qazaqstan Ulttyq banki 20 myńdyq banknota shyǵarýdyń quny qupııa aqparat ekenin aıtty.
QR Ulttyq bankiniń baspasóz qyzmeti habarlaǵandaı, aqshalaı belgilerdi daıyndaýdyń quny qupııa aqparat ári óndirýshiniń kommertsııalyq qupııasy bolyp tabylady.
Ulttyq bankte qosymsha eshqandaı shyǵyndar bolmaıdy. Banknotalar 2013 jyly shyǵarylǵan, sondyqtan ony daıyndaýǵa qazir qosymsha qarajat jumsalmady. Saqtaý, taratý, bólý jáne óńdeý úshin ortalyq bank qosymsha qarajat jumsamaıdy. Jańa banknotalardy ekinshi deńgeıli bankter beredi. Bul qarapaıym úderis jáne jańa banknotalardyń shyǵýy qosymsha qıyndyqtardy týdyrmaıdy. Ekinshi deńgeıli bankter klıentterge qyzmet kórsetý úshin óz bankomattaryn osy banknotaǵa ıkemdeýi tıis. Bul úshin kóp ýaqyt ketpeıdi. Alaıda kýpıýra qabyldaıtyn apparattardy ıkemdeýge biraq ýaqyt jumsalady. Óıtkeni tehnıkany túrli sapadaǵy kýpıýrany tanýǵa «úıretý» kerek. Banknotada mashına oqıtyn tekserilgen jáne senimdi jáne qorǵalatyn elementter qoldanyldy. Banknotanyń eskirýine qaramastan, ol óz qasıetin joımaıdy.
