20 myń teńge úshin tanysyn óltirgen qostanaılyq 9 jylǵa sottaldy
QOSTANAI. QazAqparat - Tanysyn býyndyryp óltirgen Qamysty aýdanynyń 32 jastaǵy turǵyny 9 jylǵa sottaldy, dep habarlaıdy «QazAqparat» HAA tilshisi
Qaıǵyly oqıǵa byltyrǵy jyldyń 20 qazany kúni bolǵan. Anyqtalǵandaı, 32 jastaǵy qamystylyq tanysyn 20 myń teńge úshin óltirgen.
«Qamysty aýdanynyń turǵyny A.Rerıh óz úıinde 46 jastaǵy E.Grýsheva esimdi tanysymen birge spırttik ishimdik ishedi. Sálden soń olardyń arasynda janjal týyndaıdy. Sebebi Rerıh Grýshevadan burynǵy qaryzyn suraıdy. Áıel qansha aqtalǵanymen, Rerıh ashýǵa býlyǵyp, ony 20 mınýt boı býyndyrady. Buǵan qosa kúdikti jábirlenýshini tepkiniń astyna alady», - delingen oblystyq sottyń baspasóz qyzmeti habarlamasynda.
Birshama ýaqyttan soń Rerıh áıeldiń múrdesin jertólege aparyp tastaıdy. Eki kún ótken soń ol óziniń tanysy, burynǵy tártip saqshysyna qońyraý shalyp, úıinen áıel adamnyń denesin taýyp alǵanyn aıtady. Al eks-polıtseı jergilikti ýchaskelik ınspektorǵa habar bergen. Tergeý kezinde kúdikti óz kinásin moıyndady.
Ol osy qylmysy úshin 9 jylǵa sottaldy. Jazasyn qaýipsizdigi barynsha joǵary qylmystyq-atqarý júıesi mekemesinde óteıdi.
