20 myń teńge úshin adam óltirgen qyzylordalyqqa sot úkimi shyqty
QYZYLORDA. QazAqparat - Qyzylorda oblysynyń qylmystyq ister jónindegi mamandandyrylǵan aýdanaralyq soty 20 myń teńge úshin adam óltirgen 25 jastaǵy azamatqa qatysty aıyptaý úkimin shyǵardy, dep habarlady QazAqparat oblystyq sotqa silteme jasap.
Qylmystyq is málimetterine sáıkes, sottalýshy barlyq aqshasyn kompıýterlik klýbta jumsap, basqa qarajat tabýdyń joldaryn izdegen. Sóıtip, uıaly telefon arqyly «Delıýks» taksı fırmasyna habarlasyp, onyń operatoryna qolyndaǵy kýpıýra iri ekendigin, ıaǵnı júrgizýshide 20 myń teńgege qaıtaratyn aqsha bolýy kerektigin eskertken. Taksıst belgilengen jerge kelgen soń, sottalýshy artqy jolaýshy oryndyǵyna otyryp, óziniń senimdi jolaýshy ekenin kórsetý maqsatynda birneshe jerge baratynyn aıtyp, qalany 3 saǵat boıy aınalyp júredi. Óziniń oıyndaǵy qylmystyq pıǵylyn júzege asyrý maqsatynda júrgizýshige qarańǵy kóshege burylýyn surap, kóp uzamaı toqtaýyn ótinedi. Atalǵan jerge jetken soń, sottalýshy taksı júrgizýshisiniń jelkesinen tapanshamen eki márte atyp, onyń qaltasynan 20 myń teńgeni alady. Sóıtip, máıitti artqy oryndyqqa aýystyryp, kólikti ózi aıdap ketedi. Turlyǵulov kóshesine jetkennen keıin, máıit jatqan kólikti órtep, oqıǵa ornynan iz sýytqan.
Qyzylorda oblysynyń qylmystyq ister jónindegi mamandandyrylǵan aýdanaralyq sotynyń úkimimen sottalýshy E. Qazaqstan Respýblıkasynyń Qylmystyq Kodeksiniń 99-baby 2-bóliginiń 8-tarmaǵymen (paıdakúnemdik nıetpen adam óltirý), 192-baby 2-bóliginiń 4-tarmaǵymen (qarýdy paıdalaný arqyly jasalǵan qaraqshylyq), 202-baby 2-bóliginiń 1-tarmaǵymen (órt qoıý arqyly bótenniń múlkin qasaqana búldirý) kináli dep tanylyp, múlki tárkilene otyryp, 15 jylǵa bas bostandyǵynan aıyryldy.
Úkim zańdy kúshine engen joq.
