20 myń almatylyq TJ týraly jedel habarlama joldaıtyn mobıldik qosymshany qoldanady
ALMATY. QazAqparat- Almatylyqtarǵa TJ týraly jedel habarlaýdyń tegin mobıldi qosymshasy qoljetimdi, dep habarlaıdy Qazaqparat tilshisi Almaty ákimdiginiń baspasóz qyzmetine silteme jasap.
Jobany qala ákimdigimen birge TJ departamenti jáne qazaqstandyq kompanııa - «I2NIK» JShS bıýdjet qarjysyn jumsamaı, Smart Almaty baǵdarlamasy aıasynda júzege asyrýda.
Mobıldi qosymshany Android jáne iOS bazalaryndaǵy qurylǵylar arqyly qazaq, orys jáne aǵylshyn tilderinde júktep alýǵa bolady, qazirgi kezde ony 20 myńnan astam tutynýshy paıdalanýda.
«Darmen» qosymshasyn jasaý úshin Japonııa jáne AQSh-tyń tájirıbesi zertteldi. Qosymsha birneshe sekýnd ishinde ǵana halyqty TJ qaýpi jáne bolýy múmkin zardaptary (sonyń ishinde daýyldar týraly eskertýler) jóninde habardar etedi.
Almatyǵa jaqyn ornalasqan seısmologııalyq datchıkter arqyly avtomatty rejımde jerdiń silkinýi týraly push-eskertý jibere alady.
Mobıldi qosymsha qoldaný tájirıbesinen ótti jáne burynǵy SMS-habarlamalarmen salystyrǵanda eskertýlerdi jedel jiberetinin kórsetti.
Buǵan deıin, qala ákimi Baqytjan Saǵyntaev japondyq sarapshymen jer silkinisi týraly aldyn ala eskertý júıesin ornatýdy talqylaǵan bolatyn.
