20 myń adamnan asa adam Qazaqstan Respýblıkasynyń jańa azamattary bolady
ASTANA. Maýsymnyń 22-si. QazAqparat - Aqordada Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaevtyń tóraǵalyǵymen Qazaqstan Respýblıkasy Prezıdentiniń janyndaǵy Azamattyq máseleler jónindegi komıssııanyń kezekti májilisi bolyp ótti, dep habarlady QR Prezıdentiniń baspasóz qyzmeti.
Komıssııa otyrysynda Qazaqstan azamattyǵyn alǵysy keletinderdiń materıaldary qaraldy. Tıisti jarlyqqa Elbasy qol qoıǵannan keıin 20 myń adamnan asa adam Qazaqstan Respýblıkasynyń jańa azamattary bolady, bulardyń ishinde qazaqtar jáne TMD elderi men alys shetelderden kelgen basqa ult ókilderi bar.
«Búgingi otyrys elimizdiń tarıhyndaǵy aıryqsha kún - táýelsiz Qazaqstan Astanasynyń kúni qarsańynda ótýiniń mańyzy erekshe. Astana damyǵan ortalyq bolyp qana qoımaı, sonymen birge qazirgi zamandaǵy orasan zor ýrbanıstik jobalardyń biri retinde egemen Qazaqstannyń úlken áleýetin kórsetedi. Búgin bizdiń azamattyǵymyzdy alýǵa jáne qazaqstandyq bolýǵa ynta bildirip otyrǵan 20 myńnan asa adamnyń ótinishterin qarastyrýymyz da onyń dáleli bolyp tabylady», - dep Qanat Saýdabaev atap ótti.
Bul sandar sońǵy jyldardyń ósý úrdisin jalǵastyrady, osy jyldar aralyǵynda biz jańa azamattardyń elimizge turaqty kelýin baıqaımyz, onyń ishinde qazaqtarmen qatar basqa da ulttardyń ókilderi bar. Elimiz egemendik alǵaly beri Respýblıkanyń azamattyǵyna 600 myńnan astam adam qabyldandy, onyń eń kóp bóligi sońǵy birneshe jylda qabyldanǵan.
Budan ári Q.Saýdabaev: «Qazaqstannyń azamaty bolýǵa ártúrli elderden talpynýshy adamdardyń sanynyń ósýi Ult Kóshbasshysy dep tanylǵan, - Nursultan Ábishuly Nazarbaevtyń basshylyǵymen táýelsizdik alǵan jyldardan beri Qazaqstannyń áleýmettik-ekonomıkalyq jáne qoǵamdyq-saıası jetistikteriniń joǵary dárejede halyqaralyq moıyndalýy onyń taǵy bir dáleli, - dep atap kórsetti.
Biz mereke qarsańynda jańa qazaqstandyqtardy qarsy alýǵa qýanyshtymyz jáne olarǵa baqyt, amandyq, jemisti ómir jáne tabys tileımiz. Jaýapty memlekettik organdardyń mindeti - olardyń jańadan tapqan otandarynda tezirek beıimdelýin qamtamasyz etý máselelerin jyldam jáne jaýapkershilikpen sheshý», - dep qorytyndylady sózin Memlekettik hatshy - Syrtqy Іster mınıstri.
