20 mln teńgeniń malyn urlaǵan: Almaty oblysynda barymtashylar ustaldy
ALMATY. KAZINFORM – Almaty oblysynda shamamen 20 mln teńgeniń malyn urlaǵan barymtashylar quryqtaldy.
Polisia.kz-tiń málimetinshe, krımınaldyq polıtsııa qyzmetkerleri prokýratýranyń úılestirýimen mal urlyǵyna qatysy bar bir top adamdy qolǵa túsirdi.
Jedel-izdestirý sharalary barysynda kúdik týdyrǵan eki avtokólik toqtatylyp, olardyń júksalǵyshynan urlanǵan jeti bas mal tabyldy. Oqıǵa ornynda 28 ben 34 jas aralyǵyndaǵy úsh er adam ustalyp, tergeý júrgizý úshin polıtsııa bólimine jetkizildi.
Tekserý nátıjesinde olardyń áreketterinen Jambyl aýdany Degeres aýylynyń turǵyndary zardap shekkeni anyqtaldy. Urlanǵan mal ıelerine qaıtaryldy.
Tergeý barysynda ustalǵandardyń Jambyl jáne kórshiles Qarasaı aýdandarynda jasalǵan on 15 mal urlyǵy deregine qatysy bary belgili boldy. Quqyq qorǵaý organdary olardyń qylmysqa qatysy bar yqtımal sybaılastary men urlanǵan maldy satyp alýshylardy anyqtaý jumystaryn jalǵastyrýda.
Ázirge keltirilgen shyǵyn kólemi 20 mln teńge shamasynda. Atalǵan faktiler boıynsha qylmystyq ister tirkelip, kúdiktiler ýaqytsha ustaý ızolıatoryna qamaldy.
Tergeý amaldary jalǵasyp jatyr.
Eske sala keteıik, buǵan deıin Almatyda jasyryn aýdıo jazýǵa arnalǵan qalam satqan turǵyn ustalǵanyn jazǵan edik.