20 myń stýdent hostel jaǵalap júr
Ǵylym jáne joǵary bilim mınıstri Saıasat Nurbek elimizde qansha stýdent hostelderde turyp jatqanyn aıtty, dep habarlaıdy Kazinform.
«Jalpy, elimiz boıynsha qaýipsizdigi, jaılylyǵy jáne basqalary saqtalǵan shamamen 170 hostelmen, Almatyda 85 hostelmen kelisimshart jasalǵan. 20 myńǵa jýyq stýdent hostelderde turyp jatyr», - dedi mınıstr Úkimet otyrysynan keıingi brıfıngte agenttik tilshisiniń saýalyna oraı.
Osy rette Saıasat Nurbek joǵary oqý oryndarymen kelisimshart jasasqan hostelderge ǵana monıtorıng júrgiziletindigin jasyrǵan joq.
«Degenmen, stýdentterdiń baspana tańdaýyna – páter jaldap, hostelderde turýyna shekteý qoıýǵa quqyǵymyz joq. Mundaı esep júrgizý óte qıyn, múmkin emes desek te bolady. Óıtkeni, jataqhanadaǵy orynnan bas tartatyn stýdentter de bar», - dedi ol.
Sonymen qatar ol qaza bolǵan stýdentterdiń JOO-men kelisimshart jasaspaǵan hostelde ne úshin turǵandyǵyna qatysty saýalǵa jaýap berdi.
«Qazirgi ýaqytta úkimettik komıssııa barlyq sebepteri men zań buzýshylyuqtardy anyqtap jatyr. Solardyń sheshimin kútýmiz qajet», - dedi mınıstr.
