20 myń gektarǵa jýyq: Aqtóbede jaıylym jer tapshy
AQTÓBE. KAZINFORM – Oblysta Alǵa jáne Mártók aýdandarynda jaıylym tapshylyǵy tirkeldi. Eki jyl buryn 90 myń gektardan assa, búginde 20 myńǵa jýyqtaıdy.
Aqtóbe oblystyq jer qatynastary basqarmasynyń habarlaýynsha, Alǵa aýdanynda 15 myń gektar jaıylym tapshylyǵy máselesi joıylǵan. Al Mártók aýdanynda jaıylym tapshylyǵy 27,1 myń gektarǵa azaıdy.
- Jaıylym tapshylyǵy máselesin qaıtarylǵan jer esebinen odan ári azaıtý úshin aýyldyq eldi mekender aýmaǵynda jer-sharýashylyq ornalastyrý jobalary ázirlenip jatyr. Sonymen qatar jaıylymdy tıimdi paıdalaný jáne olardyń jaǵdaıyn jaqsartý maqsatynda qala jáne aýdan ákimdikteriniń jer qatynastary bólimderi 5 jyldyq jaıylymdardy basqarý josparyn ázirlep, bekitti. Búginde Aqtóbe qalasy men oblystyń barlyq aýdanynda jaıylymdy basqarý jospary bar,- dedi Kazinform saýalyna Aqtóbe oblystyq jer qatynastary basqarmasy.
Aqtóbe oblysy ákiminiń baspasóz qyzmetiniń habarlaýynsha, 2024 jyly jaıylym tapshylyǵy 97 myń gektardy qurasa, búginde bul kórsetkish 18,9 myń gektarǵa qysqarǵan. Sonymen birge tórt jyl ishinde memleket menshigine 1 mln 256 myń gektar aýyl sharýashylyǵy jeri qaıtaryldy. Onyń ishinde bıyl 120,9 myń gektar jer jekeden memleket menshigine ótti.
Aıta keteıik, elimizde jaıylym tapshylyǵy 3,5 mln gektarǵa qysqardy. Bul týraly Astanada Aýyl sharýashylyǵy mınıstri Aıdarbek Saparovtyń tóraǵalyǵymen vedomstvo alqasynyń otyrysynda málim boldy.
