20 mıllıonynshy turǵyn: Atyraýda dúnıege kelgen sábıdiń esimi – Muhammad
Elimizdiń 20 mıllıonynshy turǵyny atanǵan bes sábıdiń biri Atyraý qalasynda ómirge keldi. Jumaǵazıevter otbasynyń tuńǵysh sábıiniń esimi - Muhammad, dep habarlaıdy Kazinform.
Búgin Atyraý oblysynyń ákimi Serik Shápkenov qalalyq perınataldy ortalyqqa baryp, aqjoltaı qýanyshqa kenelgen otbasyny quttyqtady.
Sábıdiń týý týraly kýáligin ata-anasyna tabys etti.
— Alty alash úshin aq túıeniń qarny jarylǵan bul kúnniń astarynda memlekettiń jańa ekonomıkalyq, ınfraqurylymdyq syn-qaterlerdi eńsere alýy men jac urpaqtyń damýy úshin qolaıly jaǵdaı jasaýy jatqanynda esh daý joq. Memlekettik otbasylyq saıasattyń basty maqsaty — ómirdiń barlyq synaǵyna toıtarys bere alatyn urpaq tárbıeleý. Mine, búgin Qazaqstan halqy 20 mıllıon adamǵa jetti. Bul — súıinshileıtin aqjoltaı habar! Bul súıinshiletetin aqjoltaı habar! «Qubylǵan álem jarysy — aqyldy jannyń tabysy» dep Shákárim babamyz aıtqandaı, bul qýanysh — elimizdiń kókjıekten kóringen qandaı da bir daýyldyń qýatyn, ekpinin eńserip, bolashaqqa nyq qadam basýynyń belgisi, -dedi Serik Shápkenov.
«Otbasy bank» AQ oblystyq fılıalynyń dırektory Nurjan Muǵalimov Jumaǵazıevter otbasyna 2 mln teńgeniń sertıfıkatyn tabys etti.
Bul qarjyny balanyń bolashaqtaǵy qajettiligi úshin bank depozıtine salyp, Muhammadtyń oqýyna nemese baspana alýyna paıdalanady.
Muhammad Qosaı 14 qarashada dúnıege keldi. Boıy — 54 sm, salmaǵy — 3 660 gramm.
Ákesi Berik Jumaǵazıev, anasy Aıdana Orazymbetova. Tarıhı sátte qýanyshyn jasyra almaǵan ákesi Berik Jumaǵazıev kórsetilgen qurmet úshin rızashylyǵyn bildirdi.
— Tańerteń áleýmettik jelide elimizdiń 20 mıllıonynshy azamaty ómirge keldi degen jańalyqty oqydym. Іshteı meniń de ulym osylardyń qatarynda ǵoı dep oıladym. Dál sol sátte jubaıym habarlasyp, qýanyshty jańalyqpen bólisti. Bizdiń tórt jyldan beri ańsap kútken sábıimiz óziniń nesibesin eliniń berekesimen birge ákeldi. Bolashaqta Otanyn súıgen, eline, ultyna, dinine adal qyzmet etetin perzentten bolsa eken degen tilegim bar, -dedi Berik Jumaǵazıev.
Atyraý oblysynda jyl basynan beri 14 myńǵa jýyq sábı dúnıege kelgen.
