«20 mıllıonǵa jetýdiń joly bar ma?»- respýblıkalyq basylymdarǵa sholý
***
«Egemen Qazaqstan» basylymy búgingi sanynda «Komanda esebi tabylǵan amal ma?» atty maqala jarııalap, úlken másele kóterdi.
Basylymnyń jazýynsha, Elbasy Nursultan Nazarbaev bildeı mekemege bilikti dep taǵaıyndaǵan azamattardyń bara salyp óz komandasyn jınaıtynyn áldeneshe ret synǵa alǵan edi. Biraq tizgin-shylbyrdy qolǵa ala salyp, bar bılik mende dep tóńiregine tamyr-tanysyn, jaqyn-juraǵatyn, taǵy basqalardy jııatyndar aıylyn tartar emes. El kórip, bilip, otyrsa da olar Prezıdent sózin syrttaı qabyldaǵanmen, ishki esepterinen jańylmaı keledi.
Sondaı-aq osy basylym Parlament Senatynyń depýtaty, ekonomıka ǵylymynyń doktory Eleýsin Saǵyndyqovpen bolǵan «Qazaqstandyq damýdyń jańa tujyrymdamasy» atty suhbatty jarııalady. Depýtat onda Memleket basshysynyń bıylǵy jyly Qazaqstan halqyna joldaǵan Joldaýynda kórsetilgen mindetterge jáne olardy júzege asyrýǵa qatysty oılarymen bólisedi.
***
«Aıqyn» basylymynyń búgingi sanynda «20 mıllıonǵa jetýdiń joly bar ma?» atty maqala jarııalandy. Basylymnyń jazýynsha, 2020 jylǵa qaraı qazaqtardyń sany 20 mıllıonǵa jetpeıdi. Keshe Parlament aldynda esep bergen Statıstıka agentiginiń basshysy Álıhan Smaıylov osyndaı kóńilsiz málimdeme jasady. Ǵalymdar Qazaqstan turǵyndarynyń qatary eleýli ósip jatqandyǵyn anyqtapty. Bir qýantarlyǵy, bul baqýatty Qazaq eline qaptap qonystanýshy mıgranttardyń emes, negizinen, halqymyzdyń óziniń tabıǵı ósiminiń esebinen bolyp otyr eken. Al bir qynjyltarlyǵy, sonyń ózinde, Statıstıkalyq agenttiktiń esepteýinshe, qazaqstandyqtardyń sany 7 jyldan keıin 18,7 mıllıonǵa ázer jetpek.
Osy basylym betinde jarııalanǵan «Endi atqarǵan jumysyna qaraı aqsha alady» atty maqalada elimizdiń kardıohırýrgtary AQSh-taǵy áriptesterimen birdeı jalaqy alatyndyǵy aıtylǵan. Buny keshe «Qazaqstandyq ınterventsııalyq kardıologtar jáne rentgenhırýrgter qoǵamy» respýblıkalyq birlestiginiń tuńǵysh sezinde Densaýlyq saqtaý vıtse-mınıstri Erik Baıjúnisov málimdegen. Onyń sózinshe, Densaýlyq saqtaý mınıstrligi dápigerlerdiń eńbekterin laıyqty baǵalaý maqsatynda, olardyń aılyq jalaqylaryn kóterý máselesine shyndap kirisip jatyr. Bul úshin arnaıy baǵdarlama da ázirlengen. Sondyqtan bolashaqta otandyq dárigerlerdiń aılyqtary atqarǵan jumystaryna saı bolady.
***
«Testiniń tómengi mejesin 60 upaıǵa kóterýge qatysty usynys qabyldanǵan joq». Bilim jáne ǵylym mınıstrligi, Ulttyq testileý ortalyǵynyń dırektory Qalı Ábdıevtiń «Alash aınasy» basylymyna bergen suhbaty osyndaı taqyryppen jarııalandy. Ortalyq dırektorynyń aıtýynsha, negizinen biryńǵaı ulttyq testileý kezinde kóbinese tehnıkalyq qateler bolady, Máselen, ótken jyly testige 126 myń bala qatysty. Demek, olar úshin 126 myń test kitapshasy basyldy. Ol kezde 108 qate tabyldy. Onyń basym bóligi - tehnıkalyq qateler. «Test kitapshasyn bastyrǵan kezde, testiniń jaýaby durys basylmaı nemese múldem kórsetilmeı qalǵan. Al testiniń mazmuny boıynsha, ketken qateler kóp emes. Olar kóbinese tarıh, matematıka jáne qazaq tili sııaqty mindetti pánder boıynsha jıi kezdesedi»,-deıdi Q.Ábdıev. Onyń ulttyq biryńǵaý testileýge qatysty málimetterimen «Alash aınasy» basylymynyń búgingi sanynan tanysa alasyzdar.
***
«Kazahstanskaıa pravda» basylymynyń jazýynsha, elimizdiń Aýyl sharýashylyǵy mınıstrligi bıyl 15 mıllıon tonna astyq jınaımyz dep josparlap otyr. Reseı 100 mıllıon, Ýkraına budan eki ese az astyq jınamaq. Alaıda bul málimetter ázirge tek ortasha mólshermen alǵandaǵy esep. Aýyl sharýashylyǵy mınıstrliginiń Jerdi ıgerý departamentiniń bastyǵy Anna Býtstiń sózinshe, Qazaqstannyń kúrt ózgeretin klımattyq jaǵdaıynda naqty boljam jasaý qıyn. Al ázirge egin egý naýqany josparǵa saı júrip jatyr. Dándi daqyldardy bıyl 16,3 mıllıon gektarǵa egý josparlanyp otyr. Bul máselelerdiń barlyǵy keshe RIA «Novostı» agentiginiń Astanadaǵy ókildiginde ótken Astana-Máskeý-Kıev telekópirinde kóterilip, «Kazahstanskaıa pravda» basylymynda «Posevnaıa: vse po planý» atty taqyryppen basyldy.
