20 maýsymda Qazaqstanda jaýyn-shashynsyz, ystyq aýa raıy kútilýde
ASTANA. 19 maýsym. QazAqparat - Qazaqstannyń basym bóliginde antıtsıklon yqpaly saqtalady, dep habarlaıdy Qazgıdrometke siltememen TJM baspasóz qyzmetinen.
20 maýsymda jaýyn-shashynsyz, ystyq aýa raıy bolady dep kútilýde, tek respýblıkanyń batysynda jáne soltústik-shyǵysynda atmosferalyq aǵyndar yqpalymen keı jerlerde naızaǵaı jarqyldap, jańbyr jaýady, shań kóterilip, uıytqyǵan jel soǵady.
Shyǵys Qazaqstan oblysynda, kúndiz Jambyl, Ońtústik Qazaqstan, Mańǵystaý oblystarynda keı jerlerde 15-20 m/s-qa deıin jel soǵady.
Atyraý, Batys Qazaqstan oblystarynda, kúndiz Qyzylorda oblysynda keı jerlerde shań kóterilip, jel 15-20 m/s kúsheıedi.
Batys Qazaqstan, Aqtóbe oblystarynda, Atyraý, Qostanaı, Qaraǵandy, Jambyl oblysynyń keı jerlerinde qatty ystyq bolady dep kútilýde.
Respýblıkanyń batysynda, soltústik-batysynda, soltústik-shyǵysynda, ońtústiginde jáne ortalyǵynda keı jerlerde tótenshe joǵary órt qaýpi saqtalady.
Jaqyn kúnderde respýblıka ońtústiginiń, ońtústik-shyǵysynyń jáne shyǵysynyń kóptegen taýly ózenderinde sý deńgeıiniń turaqsyzdanýy kútilýde. Qazaqstannyń qalǵan sýly nysandarynda gıdrologııalyq tártipte aıtarlyqtaı ózgerister kútilmeıdi.
