20 maýsymda joǵary oqý oryndaryna qujat qabyldaý bastalady
ASTANA. KAZINFORM - QR Ǵylym jáne joǵary bilim mınıstrligi 20 maýsymnan bastap elimizdiń barlyq joǵary oqý oryndarynda qabyldaý komıssııalarynyń jumysy bastalatynyn habarlady.
UBT tapsyryp, memlekettik bilim berý granttary konkýrsyna qatysýdy josparlamaıtyn talapkerler 20 maýsymnan bastap ózderi tańdaǵan joǵary oqý oryndaryna aqyly negizde oqýǵa túsý úshin qujattaryn tapsyra alady.
Memlekettik bilim berý grantyn alýǵa úmitker talapkerler úshin granttar konkýrsyna qatysýǵa ótinishter qabyldaý 2026 jylǵy 13-20 shilde aralyǵynda júrgiziledi. Osy kezeńde talapkerler ózderi oqýǵa túskisi keletin bilim berý baǵdarlamalary men joǵary oqý oryndaryn tańdaı alady.
Memlekettik bilim berý granttary konkýrsyna qatysýǵa ótinishter talapker tańdaǵan joǵary oqý ornyna qaramastan kez kelgen joǵary oqý ornynyń qabyldaý komıssııasy arqyly qabyldanady. Talapkerlerge qolaıly jaǵdaı jasaý maqsatynda ótinishterdi joǵary oqý oryndarynyń vırtýaldy qabyldaý komıssııalary arqyly jáne eGov elektrondyq úkimet portaly arqyly onlaın formatta tapsyrý múmkindigi de qarastyrylǵan.
-Esterińizge sala ketsek, mınımaldy shekti baldar ózgerissiz qaldy. Ulttyq joǵary oqý oryndaryna túsý shekti baly – 65 ball, basqa JOO-larǵa 50 ball, «Pedagogıkalyq ǵylymdar» bilim berý salasy boıynsha – 75 ball, «Densaýlyq saqtaý» bilim berý salasy boıynsha – 70 ball, «Quqyq» daıarlaý baǵyty boıynsha – 75 ball. Bul rette «Qazaqstan tarıhy» jáne UBT-nyń eki beıindik páni jáne (nemese) shyǵarmashylyq emtıhan boıynsha keminde 5 ball, al «Oqý saýattylyǵy» men «Matematıkalyq saýattylyq» pánderi boıynsha keminde 3 baldan jınaý qajet. Joǵary oqý oryndary bilim berý baǵdarlamalarynyń toptary boıynsha ózderiniń shekti baldaryn belgileı alatynyn aıta ketken jón,-delingen habarlamada.
Memlekettik bilim berý granttarynyń ıegerleri tizimi 2026 jylǵy 10 tamyzǵa deıin jarııalanady.
-Talapkerlerdiń nazaryn shyǵarmashylyq jáne arnaıy emtıhandardy ótkizý tártibi, bilim berý baǵdarlamalarynyń erekshelikteri, oqý sharttary, jataqhanamen qamtamasyz etý jáne oqýǵa túsýge qatysty ózge de máseleler boıynsha ózderin qyzyqtyratyn joǵary oqý oryndarynyń qabyldaý komıssııalaryna tikeleı júginýge shaqyramyz, - dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Joǵary oqý oryndaryna qujat qabyldaý 2026 jylǵy 25 tamyzǵa deıin jalǵasady.
Osyǵan deıin Qazaqstanda bilim berý granttaryn taǵaıyndaý konkýrsyna qujat qabyldaý 13-20 shilde aralyǵynda ótedi.
