20 match, 19 jeńis: qazaqstandyq tennısshi álemdik serııada úzdik atandy
ASTANA. KAZINFORM — Qazaqstandyq tennısshi Dmıtrıı Popko erler arasyndaǵy World Tennis Tour týrnırler serııasynda aıdyń úzdik oıynshysy boldy, dep habarlaıdy QTF baspasóz qyzmeti.
29 jastaǵy qazaqstandyq sportshy maýsymnyń bul kezeńin óte sátti ótkizip, 20 matchtyń 19-ynda jeńiske jetti. Osy aralyqta Popko M15 sanatyndaǵy úsh týrnırde chempıon atanyp, taǵy bir jarysta fınalǵa deıin jetti.
Qazaqstandyq tennısshi Tsahkadzorda (Armenııa) ótken M15 sanatyndaǵy eki týrnırde qatarynan jeńimpaz atandy. Alǵashqy jarystyń fınalynda Popko argentınalyq Ignasıo Monsondy 6:3, 6:4 esebimen jeńse, bir aptadan keıin sheshýshi matchta Dmıtrıı Bessonovtan 6:3, 6:2 esebimen basym túsip, taǵy bir júldeni ıelendi. Eki týrnır de ashyq grýnt korttarynda ótti.
Odan keıin Qazaqstan ókili sátti serııasyn jalǵastyryp, Telavıde (Grýzııa) ótken M15 týrnırinde jeńiske jetti. Sondaı-aq Popko Kýrshýmlııa-Banıadaǵy (Serbııa) M15 týrnıriniń fınalyna deıin jetti.
Bul sátti kezeń Popko úshin bıylǵy maýsymdaǵy eń jarqyn nátıjelerdiń biri boldy. ITF málimetinshe, 2026 jyly qazaqstandyq tennısshi kásibı deńgeıde ótkizgen 43 matchtyń 30-ynda jeńiske jetti. Ásirese grýnt tósenishinde nátıjeli óner kórsetip, 30 kezdesýdiń 23-inde jeńiske jetken.
Sátti óner kórsetkeni úshin World Tennis qazaqstandyq tennısshini World Tennis Tour Men’s Player of the Month jeke marapatymen atap ótti.
Budan buryn tennısten HH jazǵy Azııa oıyndarynda Qazaqstan qorjynyna 2-júlde túskenin jazǵanbyz.
