20 kún ishinde qar qursaýynda qalǵan 35 myń jolaýshy qutqaryldy

NUR-SULTAN. QazAqparat – 20 qańtardan beri respýblıkalyq mańyzy bar joldarda qar qursaýynda qalyp qoıǵan 35 myńnan astam jolaýshy qutqaryldy. Bul jaıynda QR ІІM TJK Daǵdarys jaǵdaılarynda basqarý ortalyǵynyń ókili Lıýbov Ablanova aıtty, dep habarlaıdy QazAqparat tilshisi.

«Respýblıka aýmaǵynda aýa raıynyń nasharlaýyna baılanysty 20 qańtar men 7 aqpan aralyǵynda oblys joldaryndaǵy qolaısyz jaǵdaıǵa tap bolǵan 35 myńnan astam adam qutqaryldy. Onyń ishinde 370 bala bar. 4 myńnan astam evakýatsııalandy jáne joldardyń tazalanǵan bóligine 35 myńǵa jýyq tehnıka shyǵaryldy. Tek ótken táýlikte ǵana respýblıka joldarynda 35 adam, onyń ishinde bir bala qutqarylyp, 12 tehnıka qar qursaýynan shyǵaryldy», - dedi Lıýbov Ablanova QR ІІM baspasóz qyzmeti taratqan vıdeo materıalda.

Onyń dereginshe, aýa raıynyń nasharlaýyna baılanysty respýblıka joldarynda qalyptasqan jaǵdaıǵa den qoıý úshin azamattyq qorǵaý kúshteri men tehnıkalary jaýyngerlik daıyndyqqa keltirildi. Búgingi tańda aýa raıynyń qolaısyzdyǵyna jáne joldardy qardan tazalaýǵa baılanysty Aqmola, Shyǵys Qazaqstan, Qostanaı, Soltústik Qazaqstan oblystarynda 28 jol ýchaskesi jabyq.

«Onyń 4-eýi respýblıkalyq jáne 24-i oblystyq mańyzy bar jol. Qar qursaýynda qalǵan adamdardy qutqarý jáne evakýatsııalaý boıynsha sheshimdi jedel qabyldaý nátıjesinde úsik shalýǵa jáne adamdardyń qaza tabýyna jol berilgen joq», - dedi ortalyq ókili.