20 keli jylqy eti, 40 keli dári-dármek - Boksshylarymyz Azıadaǵa attandy
QR Boks federatsııasynyń málimetinshe, Qazaqstan komandasy aldymen Astanadan Bangkokqa deıin ushady. Odan keıin úsh saǵat ushaq kútip, 4 saǵat ushyp Djakartaǵa jetedi. Alǵashqy eki kúnde boksshylarymyz demalyp, jergilikti klımatqa, tamaǵyna beıimdeledi.
«Alǵashqy eki kún beıimdelý ýaqyty. Al 18-i kúni oıyndardyń ashylý rásimine qatysamyz. 19-ynan bastap alǵashqy kezdesýlerge daıyndyqty bastaımyz. Ózimizben birge 20 keli jylqy etin áketip baramyz. Jigitter kimge qansha jáne qaı ýaqytta jeý kerektigin ózderi sheshedi», - dedi ulttyq quramamyzdyń bas jattyqtyrýshysy Myrzaǵalı Aıtjanov.
Komandanyń dárigeri Irek Satovtyń aıtýynsha, Azııanyń ystyq elderinde ishek juqpaly aýrýlaryn juqtyrý qaýpi joǵary.
«Sondyqtan múmkindiginshe qoldy jıi jýý kerek. Biz shúmekten aǵyp turǵan sýmen tizdi tazalamaýǵa keńes beremiz. Bótelkedegi sýdy paıdalanǵan jón. Barlyq ýaqytta da mundaı jarystarǵa úlken júkpen baramyz. Al bul joly Azıadanyń medıtsınalyq shtaby kómektesip, keıbir dári-dármektermen qamtamasyz etedi. Sondyqtan bul joly Djakartaǵy dáriger men massajshy 40 keliden astam dári-dármek apara jatyr», - dedi ol.
Aıta keteıik, boksshylarymyzdyń sharshy alańdaǵy kezdesýleri 24 tamyzda bastalady. Fınaldyq jekpe-jekter 1 qyrkúıekte ótedi.
