20 qazanda Qazaqstanǵa kólik ákelýdiń jańa tártibi kúshine enedi
ASTANA. KAZINFORM – 20 qazannan bastap elimizge kólik ákelýdiń jańa tártibi kúshine enedi. Jeke tulǵalar endi avtobýs pen júk kóligin Qazaqstanǵa kirgize almaıdy. Bul sheshim Eýrazııalyq ekonomıkalyq komıssııanyń tehnıkalyq reglamentine engizilgen túzetýlerge baılanysty qabyldanyp otyr. Basty maqsat – kólik qaýipsizdigi men naryqty retteý.
Qarapaıym azamat tek jeńil kólik, mototsıkl, kvadrotsıkl sııaqty jeke qajettilikke arnalǵan tehnıkany ǵana rásimdeı alady. Al avtobýstar men júk kólikterin endi tek kompanııalar ımporttaıdy.
– Eýrazııalyq ekonomıkalyq komıssııanyń №74 sheshimi bar, bul sheshimde arnaıy tizbe bar. Onda jeńil avtomobılder, kvadrotsıklder, qarda júretin kólikter, mototsıklder, 12 adamnan aspaıtyn motorly kólikter jáne 5 tonnadan aspaıtyn júk tasymaldaýǵa arnalǵan kólikter jatady. Atalǵan tizbedegi kólikterge qaýipsizdik týraly arnaıy qujattama beriledi. Bul syrttan ákelinetin ımport kólikterin azaıtady, – dedi Ónerkásip jáne qurylys mınıstrliginiń bas sarapshysy Gúljan Ákimbek Jibek Joly telearnasynyń «Búgin LIVE» baǵdarlamasynda.
Sarapshynyń aıtýynsha, Qazaqstanǵa avtobýs pen júk kóligin ákelýge jeke kásipkerlerge jáne kompanııalarǵa ruqsat etiledi, olarda da kólik quralyn maquldaý týraly arnaıy qujattama bolýy kerek.
– Jeńil kólik ákelý tártibi de azdap ózgerdi, kólik quralynyń qaýipsizdigi týraly qujat kerek. Onsyz kedendik rásimderden óte almaıdy, elektrondy kólik pasportyn ala almaıdy, memlekettik tirkeýden óte almaıdy jáne kádege jaratý alymyn tóleı almaıdy, – dedi mınıstrlik ókili.
Aıta keteıik, 15 qazannan bastap Shymkentte artyq júk artqan júk kólikteri avtomatty túrde anyqtalady.