20 qazan. Týǵan kún ıeleri

ESІMDER

86 jyl buryn (1932-2016) aqyn, prozashy, jýrnalıst-pýblıtsıst, qoǵam qaıratkeri Nurǵoja Narynbaıuly ORAZ dúnıege keldi.

Qostanaı oblysy Ýrıtskıı (qazirgi Sarykól) aýdany «Oktıabr» kolhozynda týǵan. 1956 jyly Almaty qalasyndaǵy S.M.Kırov atyndaǵy Qazaq memlekettik ýnıversıtetiniń fılologııa fakýltetin bitirgen soń týǵan aýylynda muǵalim bolyp alǵashqy eńbek jolyn bastaǵan. Keıin Qostanaı oblystyq «Kommýnızm týy» gazetinde tilshi bolyp qyzmet atqarǵan. 1963 jyly  Tselınograd qalasyna qonys aýdaryp, ólkelik «Tyń ólkesi» gazetine jumysqa aýysady. 1965-1991 jyldar aralyǵynda Qazaqstan Jazýshylar odaǵynyń oblysaralyq bólimshesin basqardy. 1990 jyldan ómirden ótkenshe ózi ashqan ádebı-kórkem, qoǵamdyq-saıası «Saryarqa» (keıin «Jańa Saryarqa») jýrnalynyń bas redaktory boldy.

Qazaqstan Respýblıkasynyń eńbek sińirgen mádenıet qyzmetkeri, QR Jýrnalıster odaǵynyń M.Seralın atyndaǵy syılyǵynyń laýreaty, «Astana» jáne «Táýelsizdiktiń 10 jyldyǵy» medaldarymen marapattalǵan. «Qazaqstannyń eńbek sińirgen qaıratkeri» (2006).

Toptama óleńderi ýkraın, orys, qyrǵyz tilderine aýdarylǵan. 

68 jyl buryn (1950-1998) akter, Qazaqstannyń eńbek sińirgen ártisi Toqsyn QULYBEKOV dúnıege keldi.

Almaty oblysynyń Kerbulaq aýdanynda týǵan. Qurmanǵazy atyndaǵy Almaty memlekettik konservatorııasyn (qazirgi Qurmanǵazy atyndaǵy Qazaq ulttyq konservatorııasy) bitirgen.

1968-1970 jyldary Amangeldi ujymsharynda mádenıet úıiniń meńgerýshisi, Qazaq radıosynyń dıktory, rejısseri bolyp istedi. Sondaı-aq ol sol tusta kórermenderdiń súıikti baǵdarlamalary bolǵan «Qymyzhana», «Altybaqan», «Jebe» telehabarlarynyń júrgizýshisi boldy. 1984 jyldan ómiriniń sońyna deıin «Tamasha» oıyn-saýyq otaýynyń quramynda óner kórsetti. «Jiger» jastar festıvaliniń laýreaty.

63  jyl buryn  (1955) Norvegııa Koroldigindegi QR Tótenshe jáne Ókiletti elshisi Qaırat Qýatuly ÁBÝSEIІTOV  dúnıege keldi.    

Almaty qalasynda týǵan. S.M. Kırov atyndaǵy Qazaq memlekettik ýnıversıtetiniń tarıh fakýltetin, M.V.Lomonosov atyndaǵy MMÝ aspırantýrasyn bitirdi. Tarıh ǵylymdarynyń kandıdaty. Dotsent.
1985-1989 jyldary - QazMÝ assıstenti, aǵa oqytýshysy, dekan orynbasary. 1989-1992 jyldary - Almaty joǵary partııa mektebi, keıin Almaty polıtologııa jáne basqarý ınstıtýty álemdik saıasat jáne halyqaralyq qatynastar kafedrasynyń dotsenti. 1992-1993 jyldary - QR Prezıdenti janyndaǵy Qazaq menedjment, ekonomıka jáne boljaý ınstıtýty Strategııalyq zertteýler ortalyǵy syrtqy saıasat jáne ulttyq qaýipsizdik boıynsha baǵdarlamasynyń basshysy. 1993-1996 jyldary - QR SІM Ortalyq apparatynda jaýapty dıplomatııalyq laýazymdarda qyzmet atqardy. 1996-1998 jyldary - Qazaqstan Respýblıkasynyń AQSh-taǵy Elshiliginiń keńesshisi. 1998-1999 jyldary - QR SІM Birinshi departament dırektorynyń orynbasary, Birinshi departamenttiń dırektory, Jan jaqty yntymaqtastyq departamentiniń dırektory. 1999-2002 jyldary - QR Syrtqy ister vıtse-mınıstri. 2002-2004 jyldary - QR Syrtqy ister 1-vıtse-mınıstri. 2004-2008 jyldary - Qazaqstan Respýblıkasynyń Shveıtsar Konfederatsııasyndaǵy tótenshe jáne ókiletti elshisi, QR Úkimetiniń BUU bólimshesi jáne Jeneva qalasynda ornalasqan basqa halyqaralyq uıymdar jańyndaǵy turaqty ókili qyzmetin qosa atqarýshy. Qazaqstan Respýblıkasynyń Ulybrıtanııa jáne Soltústik Irlandııa Qurama Koroldigindegi tótenshe jáne ókiletti elshisi (2008, 2013-2014), Qazaqstannyń Irlandııa, Islandııa respýblıkalary men Shvetsııa Koroldigindegi ókiletti elshisi qyzmetin qosa atqardy (2008-2013). Qazirgi qyzmetinde 2014 jylǵy qyrkúıekten beri.

56 jyl buryn (1962) Shymkent qalasy Abaı aýdanynyń ákimi Buqarbaı Rysqululy PARMANOV dúnıege keldi.

Eńbek joly Qazyǵurt aýdany Álisher Naýaı ujymsharynyń kolhozshysy bolyp bastalǵan. 1986 jyly Kentaý qalalyq qarjy bóliminiń memlekettik kirister ınspektsııasynyń ekonomısi boldy. 1987-1988 jyldary Lenın aýdandyq qarjy bóliminiń memlekettik kirister ekonomısi, 1988-1989 jyldary Lenın aýdandyq qarjy bóliminiń aǵa salyq revızory-ınspektory, 1989-1990 jyldary Lenın aýdandyq qarjy bóliminiń bas salyq revızory-ınspektory qyzmetterin atqardy. 1994-2002 jyldary Salyq jáne qarjy polıtsııasy organynda qyzmet atqarǵan. 2007-2014 jyldary OQO Saryaǵash aýdany ákiminiń orynbasary, 2014-2016 jyldary Saryaǵash aýdanynyń ákimi qyzmetterin atqarǵan. 2016-2018 jyldary Tólebı aýdanynyń ákimi bolǵan. Qazirgi qyzmetinde - 2018 jyldyń shildesinen.

55 jyl buryn (1963-2008) aýyr atletıkadan Olımpıada chempıony Anatolıı Mıhaılovıch HRAPATYI dúnıege keldi.
Aqmola oblysynyń Atbasar qalasynda týǵan. Almatydaǵy Qazaq dene shynyqtyrý ınstıtýtyn bitirgen. Alǵashqy bapkeri - A.Sıdorov. Ol Qazaqstan jáne KSRO-nyń birneshe dúrkin chempıony, Azııa oıyndarynyń kúmis júldegeri, eki márte Azııa chempıony jáne Ortalyq Azııa oıyndarynyń, Shyǵys Azııa oıyndarynyń jeńimpazy, bes dúrkin Eýropa jáne álem chempıony, Olımpıada oıyndarynyń altyn (Seýl, 1988) jáne kúmis (Atlanta, 1996) júldegeri bolǵan.
«Qurmet» ordenimen marapattalǵan.

42 jyl buryn  (1976) Almaty qalasy ákiminiń orynbasary Arman Orazbaıuly QYRYQBAEV dúnıege keldi

Tselınograd qalasynda (qazirgi - Astana qalasy) dúnıege kelgen. 1992-1996 jyldary Qazaq memlekettik ekonomıka ýnıversıtetinde «halyqaralyq ekonomıkalyq qatynastar» mamandyǵy boıynsha oqydy.

Eńbek jolyn 1996 jyly Qazaqstan Respýblıkasy Syrtqy ister mınıstrliginiń TMD jáne Baltyq elderi basqarmasynyń referenti retinde bastady. 1997 jylǵy sáýir-mamyr aılarynda QR SІM TMD departamentinde attashe bolyp qyzmet atqardy. 1997 jyldyń mamyrynda Qazaqstan Respýblıkasynyń Ózbekstandaǵy elshiligine attashe retinde taǵaıyndaldy. 1999 - 2000 jyldary QR-dyń Ózbekstandaǵy elshiliginiń úshinshi hatshysy. 2000 jyldyń tamyz aıynda QR Syrtqy ister mınıstrliginiń Dıplomatııalyq akademııasyna oqýǵa túsip, ony támamdaǵannan keıin TMD Komıtetiniń Ortalyq Azııa jáne Zakavkaze bóliminde Ekinshi hatshy bolyp qyzmet etti. 2002 jylǵy qazannan bastap «Korporatsııa «AVE» JAQ Strategııa jáne marketıng departamentiniń dırektory, keıin Korporatıvtik damý departamentiniń dırektory. 2004 - 2005 jyldary «K-MART» JShS bas dırektory mindetin birlese atqardy. 2005 jylǵy naýryz-mamyrda Almaty qalasy Medeý aýdany ákiminiń orynbasary, 2005 jylǵy mamyrdan 2006 jylǵy sáýirge deıin Almaty qalasy Jastar saıasatyn damytý qorynyń dırektory qyzmetterinde boldy. 2006 jyldyń sáýirinen 2008 jyldyń aqpanyna deıin Mádenıet jáne aqparat mınıstrligi qoǵamdyq-saıası jumys jáne qoǵammen baılanystar departamentiniń dırektory, al 2008 jylǵy aqpannan bastap 2010 jylǵy qańtarǵa deıin Mádenıet jáne aqparat mınıstrliginiń Mádenıet komıtetiniń tóraǵasy bolyp qyzmet etti. 2010 jyldyń qańtarynan 2012 jyldyń aqpanyna deıin Qaraǵandy oblysy ákiminiń orynbasary qyzmetin atqardy. 2012-2014 jyldary Qazaqstan Respýblıkasy Mádenıet jáne aqparat vıtse-mınıstri boldy. 2014 jyldyń aqpan aıynan bastap «Nur Otan» partııasy Tóraǵasynyń birinshi orynbasarynyń keńesshisi bolǵan.

Qazirgi qyzmetinde - 2015 jyldyń qazanynan beri.