20 qazan. QazAqparat kúntizbesi
20 qazan. SENBІ
Búkilálemdik osteoporozdy emdeý kúni
Dúnıejúzilik densaýlyq saqtaý uıymynyń qoldaýymen, Ulybrıtanııanyń Ulttyq osteoporoz qoǵamynyń uıymdastyrýymen 1999 jyldan bastap atalyp ótiledi.
Halyqaralyq avıadıspetcher kúni
Amsterdamda 1961 jylǵy 20 qazanda avıatsııa dıspetcherleri qaýymdastyqtarynyń Halyqaralyq federatsııasy quryldy. Bul oqıǵa áýe kóligin damytý tarıhyndaǵy eleýli kezeńge aınalyp, sóıtip jańa kásibı meıramnyń ómirge kelýine negiz boldy. Sodan beri jyl saıyn 20 qazanda Halyqaralyq avıadıspetcher kúni atap ótiledi.
Dúnıejúzilik statıstıka kúni
2010 jyly BUU Statıstıkalyq komıssııasynyń 41-sessııasynda Dúnıejúzilik statıstıka kúnin qurý týraly sheshim qabyldandy. 2010 jylǵy 3 maýsymda BUU Bas Assambleıasy 2010 jylǵy 20 qazandy alǵashqy dúnıejúzilik statıstıka kúni dep resmı jarııalaǵan qarardy qabyldady.
Halyqaralyq bas aspazdar kúni
Mereke 2004 jyldan atap ótiledi.
ESTE QALAR OQIǴALAR
1933 jyly Ál-Farabı atyndaǵy Qazaq ulttyq ýnıversıtetiniń negizi qalandy. Bilim ordasynyń ashylý saltanaty 1934 jyly 15 qańtarda ótti. Alǵashqy kezde ýnıversıtet quramynda fızıka-matematıka jáne bıologııa fakýltetteri ǵana boldy. Búgingi tańda respýblıkanyń bedeldi oqý oryndarynyń biri.
1934 jyly Semeı memlekettik pedagogıkalyq ınstıtýtynyń irgesi qalandy. Alǵash Semeı muǵalimder ınstıtýty bolyp ashylǵan. 1937 jyldan pedagogıkalyq ınstıtýt bolyp ózgergen. Instıtýtqa 1939 jyly N.Krýpskaıa esimi, 1993 jyly Shákárim esimi berilgen. 1996 jyldan Semeıdegi basqa da joǵary oqý oryndarymen Semeı memlekettik ýnıversıtetine biriktirilip, 2004 jyldan qaıtadan derbes joǵary oqý orny mártebesin aldy. Búginde ınstıtýt qazaq jáne orys tilderinde barlyq bilim salalarynan pedagogtar daıarlaıdy. Instıtýt quramynda Halyqaralyq pedagogıkalyq bilim berý ǵylymdary akademııasynyń ekologııalyq ortalyǵy, M.Qozybaev atyndaǵy Tarıhı zertteýler ǵylymı ortalyǵy, Shákárimtaný ǵylymı-zertteý ortalyǵy jumys isteıdi.
1995 jyly Qazaqstan Respýblıkasynyń Prezıdent Ákimshiligi quryldy. Qazaqstan Respýblıkasy Prezıdenti Nursultan Nazarbaevtyń Jarlyǵymen Ákimshilik qurylymyna QR Qaýipsizdik Keńesiniń ekonomıkalyq qaýipsizdik máseleleri jónindegi bólim engizildi.
1995 jyly Qazaqstan Respýblıkasynyń Prezıdenti N.Á.Nazarbaevtyń Jarlyǵymen Ulybrıtanııa jáne Soltústik Irlandııa Birikken Koroldiginde Qazaqstan Respýblıkasynyń elshiligi ashyldy.
1997 jyly Qazaqstan Respýblıkasynyń Prezıdenti Nursultan Nazarbaevtyń Jarlyǵymen Aqmola qalasy Qazaqstan Respýblıkasynyń astanasy dep jarııalandy.
2000 jyly «Astanabasjospar» memlekettik kommýnaldyq kásiporny óz jumysyn bastady.
2005 jyly Ulybrıtanııada Azııa elderi men halyqtarynyń mádenıeti, tarıhy jáne salt-dástúrleri týraly aqparat taratýmen aınalysatyn «Asia House» uıymy qazaq folklorlyq mýzykasynyń kompakt-dıskisin shyǵardy. Kompakt-dıskini shyǵarýǵa Ulybrıtanııanyń «Topic Records» dybys jazý kompanııasy, Brıtanııanyń belgili sarapshylary men prodıýserleri Maıkl Cherch jáne Radek Boshettı qatysty.
2005 jyly Tarazda Jastar gúlzary ashyldy. Gúlzardyń qaq ortasynda qol bastaǵan Qoıgeldi batyrdyń eskertkishi tur. Batyr babanyń eskertkishin QR Prezıdenti Nursultan Nazarbaev ashqan bolatyn. Qolbasshy músininiń aınalasynda Qazaqstan men Qyrǵyzstan memleketiniń basshylary ekken qaraǵaılar ósip tur. «ÁýlıeAta» ýnıversıtetiniń stýdentteri gúlzardy óz qamqorlyqtaryna alǵan. Atalǵan joǵary oqý ornynyń stýdentteri qalalyq onomastıka komıssııasyna osy jerdi Jastar gúlzary dep ataý týraly usynys jasaǵan bolatyn. Qalanyń basshylary jastardyń usynysyna qoldaý kórsetti.
2009 jyly «Qazaq eli» monýmenti saltanaty túrde ashyldy. Tuǵyr granıttiń tórt qabyrǵasyna kólemi 3,7h6,9 metrlik qoladan quıylǵan bederbeıneler (barelef) jasalǵan. Alǵashqysy «Halyq jáne Prezıdent» dep atalady. Monýmenttiń oń jaǵyndaǵy kelesi bederbeıne - «Qaharmandyq» dep atalady. Al monýmenttiń batys jaq betinde ornalastyrylǵan «Jasampazdyq» bederbeınesinde halqymyzdyń kóshpeli dáýirden ǵaryshqa ushqanǵa deıingi joly kórsetilgen. Monýmenttiń shyǵys jaǵyndaǵy sońǵy bederbeıne «Bolashaq» dep atalady.
2010 jyly Astanada Beıbitshilik jáne kelisim saraıynda QR Prezıdenti Nursultan Nazarbaevtyń qatysýymen Qazaqstan halqy Assambleıasynyń 16-sessııasy ótti. Forým «Qazaqstan halqy Assambleıasy: senim, dástúr, ashyqtyq, toleranttylyq» dep ataldy.
2011 jyly Maındaǵy Frankfýrtte ótken halyqaralyq jármeńkede qazaqstandyq belgili jazýshy, ǵalym-túrkitanýshy, akademık Nemat Kelimbetovtiń Frants Kafka atyndaǵy Eýropalyq qoǵamnyń altyn medalin ıelengen «Úmit úzgim kelmeıdi» atty kitaby tanystyryldy.
2014 jyly Nıý-Iorkte BUU janyndaǵy Qazaqstan Respýblıkasy men Mavrıkııdiń turaqty ókilderi Qaırat Ábdirahmanov pen Mılan Djaıa Nıamradjsıngh Mıtarbhan eki memleket arasyndaǵy dıplomatııalyq qatynastardy ornatý týraly málimdemege qol qoıdy.
2015 jyly Petropavlda muz aıdyny bar Sport saraıynyń ashylý rásimi ótti. Ǵımarattyń jalpy alańy 14 853 sharshy metr, onyń qurylysyna 3 mıllıard teńge jumsaldy.
2015 jyly Astanada Qazaqstandaǵy Kýveıt Memleketi elshiliginiń jańa ǵımaraty ashyldy. Eki el arasyndaǵy dıplomatııalyq qatynastar 1993 jyly 11 qańtarda ornatyldy.
2016 jyly Memleket basshysy arab álemi elderinde iri habar taratý kompanııalarynyń biri bolyp tabylatyn «CNBC Arabia» arnasyna suhbat berdi. Áńgime barysynda Nursultan Nazarbaev Qazaqstannyń aldaǵy kezeńde BUU Qaýipsizdik keńesine múshe bolýyna, ıadrolyq qarýdy taratpaý jáne qarýsyzdaný salasyndaǵy jumsaǵan kúsh-jigerine baılanysty suraqtarǵa jaýap berip, respýblıkanyń áleýmettik-ekonomıkalyq damýy jóninde aıtty.