20 qańtardan bastap Semeı avtobýstarynda saralanǵan tarıf engiziledi

SEMEI. QazAqparat - 20 qańtardan bastap Semeıdiń qoǵamdyq kólikterinde saralanǵan tarıf engiziledi, dep habarlaıdy QazAqparat qalalyq aqparat ortalyǵyna silteme jasap.

Avtobýsta saralanǵan tarıf engizý týraly sheshim 20 qańtardan bastap kúshine enedi. Bul týraly brıfıngte Semeı qalasynyń jolaýshylar kóligi jáne avtomobıl joldary bóliminiń bastyǵy Serikqalı Jumanov málimdedi.

Sonymen, 20 qańtardan bastap «Avtobys» mobıldi qosymshasy men kólik kartasy arqyly tólenetin jol aqysy - 80 teńge, al qolma-qol aqshamen tólese - 140 teńge bolady.

Eger valıdator jumys istemeı qalsa, karta nemese mobıldi qosymsha arqyly tóleıtin jolaýshy jol aqysyn tólemeıdi, óıtkeni jabdyqtyń durys jumys isteýine tasymaldaýshylar jaýap beredi. Qalalyq avtobýstarǵa statsıonarlyq valıdatorlardy ornatý jumystary ótken jyldyń qazan aıynda bastaldy. Búgingi tańda operator 328 statsıonarlyq valıdator men 328 uıaly termınal satyp aldy. Statsıonarlyq valıdatorlar «Semey Bus» JShS jáne «Semeı avtobýs parki» JShS qyzmet kórsetetin barlyq baǵyttarda jumys isteıdi, biraq kóptegen marshrýttar QR kodtarmen áli de qamtylmaǵan. «Smart Concept» JShS ókilderi 20 qańtarǵa deıin barlyq qalalyq avtobýstar elektrondyq bıletter júıesimen qamtylady dep sendirdi. Qazirgi tańda 147 307 kólik kartasy satyldy, onyń 109 myńy - standart, 26 myńy - mektep oqýshylaryna arnalǵan, 11 myńy - áleýmettik kartalar.

Sonymen birge bıleti joq jolaýshylarǵa baqylaý kúsheıtiledi. Jergilikti polıtsııa qyzmetiniń bastyǵy Seıilbek Nurekenovtiń aıtýynsha, avtobýstarda tólem tártibin baqylaıtyn arnaıy mobıldi toptar jumys isteıtin bolady.

- Mobıldi top quramyna ákimdik ókilderi, tekserý toby jáne polıtsııa qyzmetkerleri kiredi. Jolaýshy jol júrý aqysyn tólemegeni úshin 2 AEK mólsherinde aıyppul salynady - 5302 teńge, - dedi Jergilikti polıtsııa qyzmetiniń basshysy.

Brıfıngte aıtylǵandaı, elektrondy tólem júıesin engizýmen, ýaqyt ótken saıyn, kondýktorlarda qajettilik joǵalady.

- Elektrondyq júıe engizilgen kezde, eger jumys dınamıkasy jaqsy bolsa, kondýktorlar budan bylaı qajet bolmaıdy, - dedi Serikqalı Jumanov.

Kondýktorlar jumyssyz qalmaýy úshin mobıldi toptarǵa tartylyp, jelilerde baqylaý járgizedi.

foto: mvestnik.ru