20-dan astam strımer zańsyz kontent taratqany úshin jaýapqa tartyldy
ASTANA. KAZINFORM – Іshki ister mınıstrligi ınternet pen áleýmettik jelilerde quqyqqa qaıshy kontenttiń taralýyna qarsy jumystar aıasynda zań talaptaryn buzǵan 20-dan astam strımerdiń jaýapkershilikke tartylǵanyn málimdedi, dep habarlaıdy Polisia.kz.
Vedomstvonyń málimetinshe, kóp qaralym, laık pen donat jınaýdy kózdegen strımerler tikeleı efır barysynda balaǵat sózder aıtyp, ádepsiz áreketter kórsetken, qaýipti prankter uıymdastyryp, ózge azamattardy qorlaǵan. Mundaı kontenttiń keń aýdıtorııaǵa, ásirese kámeletke tolmaǵan balalarǵa qoljetimdi bolýy erekshe alańdaýshylyq týǵyzyp otyr.
– Qazirgi tańda respýblıka boıynsha zań talaptaryn buzǵan 20-dan astam strımer jaýapkershilikke tartyldy. Zań talaptary shynaıy ómirde de, ınternet keńistiginde de bárine birdeı mindetti, – delingen ІІM habarlamasynda.
Shymkent qalasynyń 48 jastaǵy turǵyny Erbol Dúısenbaev TikTok jelisindegi tikeleı efır barysynda beıádep sózder qoldanǵany úshin sot sheshimimen 10 táýlikke ákimshilik qamaýǵa alyndy.
Taldyqorǵan qalasynyń 44 jastaǵy turǵyny Gúlmıra Qasenova TikTok-taǵy tikeleı efır kezinde qoǵamdyq tártipti buzyp, balaǵat sózder aıtqan. Buǵan deıin de osyndaı quqyq buzýshylyq úshin jaýapqa tartylǵan ol bul joly ákimshilik aıyppul aldy.
Pavlodar qalasynyń 26 jastaǵy turǵyny Aslan Amantaev kólik júrgizip kele jatyp tikeleı efırge shyǵyp, qaýipsizdik beldigin taqpaǵan ári balaǵat sózder aıtqan. Sot ony 20 táýlikke ákimshilik qamaýǵa aldy.
Túrkistan qalasynda «bayan_kyz», «fatima.sh0000» jáne «fatima_s003» akkaýnttarymen tanymal Baıan Shankeeva da tikeleı efırlerde beıádep sózder aıtyp, agressıvti minez-qulyq kórsetkeni úshin ákimshilik jaýapkershilikke tartylyp, oǵan aıyppul salyndy.
– ІІM tsıfrlyq keńistikti quqyqqa qaıshy kontentten tazartý jáne qoǵamdyq tártipti buzǵan azamattardy jaýapkershilikke tartý boıynsha júıeli jumystaryn jalǵastyra beredi. «Zań men Tártip» – jaı ǵana uran emes, árbir azamat ustanýǵa tıis qaǵıdat, – dep atap ótti mınıstrlik.
Aıta keteıik, aqtaýlyq bloger sot sheshimimen Instagram-daǵy vıdeosyn óshirýge mindetteldi.
